SAN JOSE, Antique (PIA) -- Ginpangunahan ni Senator Christopher Lawrence "Bong" Go bilang pangulo ka Senate Committee on Health and Demography ang groundbreaking ceremony kang "Super Health Centers" sa Antique kasan-o gid lamang.

May tatlo ka Super Health Centers nga ipatukod sa Antique nga makit-an sa Barangay Villafont sa banwa kang Sibalom, Barangay Igbonglo sa San Jose, kag sa banwa kang Culasi, kun sa diin ginpangunahan kang Senador ang groundbreaking rites para sa una nga darwa ka sentro.

Gindugang hambal ni Go nga sa marayo nga lugar kaangay sang mga 4th class, 5th class, kag 6th class municipalities nga nabudlayan magpa-ubra kang kaugalingun nga health facilities, dapat nga iparapit ang serbisyo kananda kag unahon sanda nga tugruan kang serbisyo para sa ikaayong lawas.

Gindayaw man kang Senador ang suporta kang iba pa nga senador kaimaw si Senator Loren Legarda para sa pondo nga gintugro sa 307 Super Health Centers kang nagligad nga tuig kag 322 pa nga dugang para sa sa kadya nga tuig sa bilog nga pungsod.

Ang nasambit nga lihuk ginpatigayon kang Department of Health kag banwa kang Sibalom kag San Jose de Buenavista sa suporta ni Antique Governor Rhodora Cadiao kag Vice Governor Edgar Denosta, Congressman Agapito Antonio Legarda, kag iban pa nga mga lokal nga opisyales. (AGP/PSM/PIA-Antique with reports from JJS-UA Intern)