ANDA, Bohol, April 23 (PIA) -- Gilaras sa usa ka enduro mountain biker ang duol sa 16 kilometers nga dalan-dalan sa mga bakilid ug suhot-suhot sa mga kasagbutan subay sa mga bahaanan, sulod lamang sa 15 minutos ug 30 segundos, didto sa labing una nga Anda Enduro 2023.
Sa nasampit nga dagan, tabla ra og iyang dagan anaa sa 58 kilometros matag oras.
Sayun ra abton sa motor. Dili sa bisekleta. Ilabi na kon ang agi-an, bakilid, kabatoan ug nipis nga dalan, kon mosipyat, labing menos mapangos ang dangatan.
Dungan sa naghaguros nga pagdaug, gibwanit ni Jundel Butal sa Team Bolok/Daja Boys sa Leyte, ang unang pwesto sa lumba sa bisekleta nga hardtail, o usa lamang ang shock nga mopahumok sa bundak unya sa bisekleta nga magtikangtikang sa mga kabato-an, gataw nga gamut sa kahoy ug bahaanan gikan sa bukid sa Anda padulhog sa menteryo sa Casica.
Ikaduha nga pwesto nakuha sa taga Tagbilaran City nga si Ruel Orcullo sa ArcFactory Racing ug Tribu Tarug Utok (TTU) team human niya makompleto ang tulo ka ruta sulod sa 16:36, o 6 ka segundos sunod ni Butal.
Ikatulo usab sa susamang hardtail category si Niño Ray Salas (team D’ Angkols) nga nakahuman sa tulo ka stage nga ruta sa 17:23 segundo, bisan pa kon ang ruta, angayan na lamang unta sa mga bisekleta nga duhay duha ka shocks alang sa full suspension.
Ikaupat sa hardtail si Aljhun Asur (ArcFactory Bike Care) nga mihuman sa 17:25 segundo, bisan pa nga nagpahaguros gihapon nili bisan sa flat nga ligid sa ikaduhang ruta samatang anaa na ika lima si Roy Geanga (Tribu de Amigas S Candijay) sa 18:03 segundos.
Sa full suspension category, ang taga Calape nga si Christian Salomon (ArcBikeCare Racing Factory) sa mas bug-at apan may piskay nga suspension, mihuman sa naglit-ad nga ruta sulod sa 15:57 segundos aron isipong champion sa Full Suspension category.
Sa susamang suspension category, ikaduha ang enduro legend sa Calape nga si Vance Gubot Sr., (Calape Trail Seekers/TTU) nga mihuman sa trail sa 16:12 segundos ug gisundan sa Cortesanon nga si Loic Barong (Manuthoay Brothers) sa ika tulo nga lugar sa podium.
Ika-upat ang Cortesanon nga si Archt. Niño Rey Angelo Cag-ong sa Team TLK nga mingkadlis sa ruta sa 17:08 segundos ug gisundan sa taga Bohol Enduro United nga si Jay Jamila sa 17:22 segundos.
Sa kategorya nga 40 anyos pataas ang edad, si EC Cruza Jr., sa Bohol Enduro United maoy kinaunhang nakahuman sa ruta sa 18:04 segundos, samtang gisundan ni Arcel Asiñero (ArcBikeCare/TTU) taga Tagbilaran City sa 18:15 segundos samtang ang taga Anda nga si Shri Visaya (sa Team Lo Anas) maoy mikuha sa ikatulo nga pwesto sa podium sa 18:45 segundos.
Ika upat sa 40 and above si Ariel Metran (D’Angkols Team) nga nahuman sa tulo ka hugna sa trails sa 19:43 segundos ug ang taga Jagna nga si Sethniel Siaboc (ArcBikeCare Racing Factory/TTU) mihuman sa ikalima sa 20:03 segundos.
Laing taga Anda nag si Karl Vincent Jandayan (Team Bunal) maoy kina-unhan nga nakatapos sa tulo ka ruta sa oras nga 16:18 segundos aron maoy ilhong hagurong king sa 29 anyos paubos nga kategorya sa mga bikers.
Nagsunod kaniya sa labing paspas nga dagan, mao ang Leyteño nga si Panfilo Gabisay Sulad Jr., (D’Angkols) nga minglaras sa finish line sa 17:12 segundos samtang si Altaire Arcay nga taga Tagbilaran ug sakop sa Anda Enduro mingtapos sa 17:30 aron makompleto ang tulo ka lugar sa podium.
Ika-upat ra sa katrgorya sa 29 below si Ezboi Kyn (ArcBike care/TTU) sa 17:33 segundos samtang si Jay Clyde Cadiz (Anda Enduro Bikers) maoy ikalima sa 19:04.
Sa mga babaye nga enduro riders, ang taga Leyte nga si Mayan Duyon (Team Bolok) nakahuman sa ruta sa oras nga 21:16 segundos ug siya gisundan sa laing taga Leyte apan ania na sa Bohol nga si Gerevel Riños (Pedal HQ/ BEU/Lo Anas) nga mitapos sa tulo ka hugna sa lisud nga ruta tadlason sa 21:33.
Sa electronic bike category, ang taga Jagna nga si Oh Mhel (D’ Angkols) maoy kina-unhan sa bisekleta nga giabagan usab sa makina pinaagi sa motor nga may baterya, sulod sa 17:35 segundos ug gisundan usab sa iyang kauban sa Jagna nga si Moyet Alvarez (D’Angkols) sa 18:42 segundos.
Kinatibuk-ang 89 ka hardcore enduro mountain-bike riders ang mingsalmot sa paduwa nga gitanyag sa LGU Anda, Bohol Enduro united ug Anda Enduro Bikers.
Gipasalig usab ni Anda Mayor Angelina SImacio nga maghimo gihapon sila sa susamang kalihukan nga mas bibo, mas daghan ang mosalmot ug mas kilbahinam pa. (RAHC/PIA Bohol)
