No. of :

No. of Shares:

Currently viewed by: Marcus Rosit

  1. Home
  2. News
  3. Supplemental immunization kontra MR, polio ginapatigayon

Supplemental immunization kontra MR, polio ginapatigayon

Write a comment

Delete

SAN JOSE, Antique (PIA) -- Gin-umpisahan ron kang mga otoridad sa dya nga probinsya ang "Chikiting Ligtas" Measles-Rubella kag Oral Polio Vaccine Supplemental Immunization Activity (MR OPV SIA).

Nakatalana sa bilog nga bulan kang Mayo, ang supplemental immunization tuyo magtugro kang dugang nga bakuna sa mga bata nga naga-edad 0-59 ka bulan para malikawan ang mga sakit nga measles ukon tipgas, rubella ukon makayha, kag polio.

Delete

Sa sangka programa sa radyo, ginhambal ni Health Education and Promotion Officer Irene Rondez-Duldoco nga kinahanglan kang mga bata nga magpartisipar sa bakunahan para makabaton kang dugang nga proteksyon kag malikawan ang pagrapta kang dya nga mga sakit sa komunidad.

Dugang hambal ni Duldoco nga ang mga bakuna pwede mabaton sa mga fixed sites pareho kang Rural Health Units (RHUs), mga ospital, kag birthing centers, kag amo man sa mga temporary ukon modified fixed sites nga ginpili kang Local Government Units (LGUs).

Delete

Magapatigayon man ang Department of Health (DOH) kag Provincial Health Office (PHO) kang mobile vaccination, ukon pagpamalay-malay, para mas duro nga kabataan ang maprotektaran batok sa mga vaccine-preventable diseases (VPD) ukon mga sakit nga pwede mapunggan kang bakuna.

Para masiguro man nga insakto nga dose kang mga bakuna ang mabaton, kinahanglan lang kang mga ginikanan ukon manugbantay nga dar-on ang Early Childhood Care and Development (ECCD) card kang mga kabataan.

Delete

Sa Antique, 58,469 nga mga bata naga edad 9-59 ka bulan ang tuyo bakunahan kontra tipgas kag makayha, samtang 68,339 nga mga kabataan nga naga-edad 0-59 ka bulan duman para sa polio.

Suno sa DOH kag PHO, kinahanglan nga mabakunahan ang 95% kang dya nga populasyon para malab-ot ang herd immunity kung sa diin indi ron makarapta ang dya nga mga sakit.

Samtang, sa sangka stakeholders meeting kang nagligad gid lamang, gintumod ni Dr. Rommel Garganera, provincial officer kang Department of Health (DOH) Antique, ang importansya kang pagbuligay kang nanari-sari nga sektor para protektaran ang mga Antiqueño sa nagkalain-lain nga health issues.

Delete

Nagpahayag man kang pagsarig ang opisyal nga mangin mabinungahon ang supplemental immunization sa bulig kag paghimakas kang mga stakeholders pareho kang Philippine National Police (PNP), Bureau of Fire Protection (BFP), Department of Education (DepEd), Department of Interior and Local Government (DILG), LGUs, mga pribado nga organisasyon, kag media practitioners.

Kang 2022, base sa report kang PHO, ang Antique may tig-sara-sara nga kumpirmado nga kaso kang tipgas kag rubella, samtang 27 ang mga suspected cases. (AGP/BPS/PIA Antique/Photo Courtesy: Provincial Health Office)

About the Author

Bernard Ceasar Susbilla

Information Officer

Region 6

Electronics Engineer/Writer

Related News

Feedback / Comment

Get in touch