TAGBILARAN CITY, Bohol, April 19 (PIA) -- Gikan sa usa  ka Pinoy nga diver nga nakasinati na sa mga dive sites sa nasud ug sa gawas sa nasud, ang dive site sa Garcia Hernandez maoy usa sa labing nindot nga iyang na-agi-an.

Si Neil Anthony Torres nga taga Manila, usa sa mga mingdaug og major award alang sa usa  ka kategorya sa underwater photography contest nga highlight sa labing una nga Bohol Loop Dive Expo (Bholdex).

Ang Bholdex 14 ka adlaw nga mga kalihukan sa divers nga mag-SCUBA o free dive aron sinati-on ang lain pa nga mga dive sites nga wala pa ikapakita sa mga divers sukad ma sukad.

Si Torres, usa sa gatusan ka mga divers nga misuhid sa mga bag-ong gibuksan nga mga dive sites sa Bohol, diin gituohan sa mga nakabisita na nga mga divers nga Panglao, Balicasag, Pamilacan lamang og Cabilao ang mga nindot nga dive sites dinhi.

Sa Bholdex, gipadala sa mga tig-organisa: ang Kagamhanan sa Bohol ubos ni Gobernador Erico Aristotle Aumentado ug  ang Panglao Association of Dive Operators (PADO) ang mga bisita nga divers didto sa mga dive sites sa Dimiao, Valencia, Garcia Hernandez, Jagna, Duero, Guindulman, Candijay, Anda, Mabini ug Ubay.

Samtang gibuksan ang mga bag-ong dive sites sa mga kalungsuran, gipanday usab didto ang mga ordinansa nga magpahiluna sa mga lagda ug buhatonon sa mga divers sa dive sites aron dili kini madaut ug maabusohan.

Gipatuman na didto ang Advance Booking System, diin ang mga buot mohimo sa dives, adto moagi sa PADO, aron makontrolar ang carrying capacity sa dive sites.

Gipatuman usab ang Environmental Users Fee nga bayaran sa matag diver sa iyang pagdive sa lungsod, kini nga pundo maoy gamiton sa mga kalihukan pagpahiuli ug pagpanindot pa sa sa mga dive sites, lakip na ang pundo nga isuhol sa mga magbantay aron dali rang mamonitor ang mga epekto sa mga kalihukan didto sa lugar sa dive sites.

Bag-o pa lamang nga nahungog sa underwater photography, si Torres ming entra sa intermediate class division ug palaran usab nga ang iyang entries, napili sa BHOLDEX 2023.

"Daghan na ko og naadtoan nga dive sites sa Pilipinas, kini maoy buhat nga gusto nako nga buhaton kay dinhi ko malingaw, butyag niya.

Apan, personal gayud nga gipili ni Torres ang dive sites sa Garcia- Hernandez is nga usa sa mga labing nindot nga dive sites nga iyang nakit-an.

Matud niya, alang sa mga taga Bohol, angayan gyud nga ipasigarbo ang unsay makit-an dire sa Bohol.

Ang mga hulagway nga akong nakuha, nagbatbat sa kapin sa  libo-an ka pulong mao nga buot ko nga ipahibaw kini sa tibuok kalibutan ang"kaanindut sa mga buhilaman sa kadagatan sa Bohol, dayag niya.

Gidaug ni Torres ang unang ganti sa hulagway sa isda nga naa pa sa ilawom sa dagat ug  ang macro/super macro categories o gipadako nga hulagway sa mga pino nga buhilaman sa ilawom sa dagat.

Sa iyang katungod, si Kongresista Vanessa C Aumentado, nagpadayag sa iyang kalipay ug tungod niini, mipasalig nga dili kini maoy katapusan nga Bholdex.

"Sa kalampusan sa Bholdex, magsugod na usab kita sa pagplano sa sunod nga loop dive," matud niya.

Ang Bholdex nagpahiluna sa sunodsunod nga mga kalihukan sa diving sa mga bag-ong dive sites, kalihukan alang sa kalikopan sama sa mga lectures sa mga tunghaan, pagpadayag sa mga produkto sa kalungsuran, ug kini giapilan, didli lamang sa mga taga lungsod kon dili lakip na ang gatusan ka mga divers nga mingsalmot sa kalihukan.

Gawas sa Bohol ug PADO, ang Bholdex gisuportahan usab sa Department of Tourism (DOT), Tourism Promotions Board, Dive 7, ug sa Villa Tomasa Alona Kew Resort. (RAHC/PIA7 Bohol)