BAGUIO CITY (PIA) -- Inilabas ni Mayor Benjamin Magalong  ngayong araw (MAy 17) ang Executive Order No. 63, Series of 2023 na nagmamandato ng pagsusuot ng face mask sa mga indoor spaces sa lungsod.
 
Sa pahayag na inilabas ng Baguio City Public Information Office, nakasaad na sa naturang kautusan ay kailangang sundin ang health protocols sa indoor, enclosed spaces gaya ng work places, classrooms, event venues, banquet halls, conference rooms, at iba pa.
 
Maaari namang tanggalin ang face mask kapag kumakain o umiinom, kapag sumailalim sa medical, dental o personal care procedures na kailangang magtanggal ng face mask, at kapag may physical fitness activities. 

Ipinaalala rin ng alkalde na mandatory ang pagsusuot ng face mask sa loob ng public utility jeepneys at taxi.
 
Una nang binigyang-diin ni Magalong na kailangang obserbahan ang minimum public health standards lalo na ang pagsusuot ng face mask dahil sa tumataas na kaso ng COVID-19 sa lungsod. Aniya, umaabot sa 13-14 na COVID-19 cases ang naitatala bawat araw.

"We are now requiring our constituents and the visitors to wear their face mask. We advised church leaders and iba't ibang congregations to also observe wearing of face mask. Avoid muna natin ang hand shake, gamitin muna natin ang fist bump at elbow bump," ani Magalong.
 
Nilinaw naman nito na hindi nila kinokontrol ang galaw ng tao pero kailangan lang ipatupad ang naturang health protocol. "This is one way of mitigating and hopefully, we will be able to reduce the number of case where our forecast is that there will be an increasing trend for the next three to four weeks pa bago natin ma-realize talaga 'yung pagpa-plateau niya," aniya.

Hinala ng alkalde, nakarating na sa lungsod ang Arcturus variant ng COVID-19 na sinasabing mas nakakahawa kaysa sa Omicron variant.
 
Hindi naman malala ang sintomas ng mga kasalukuyang COVID-19 patients at nananatiling mababa ang hospital utilization rate sa lungsod. (DEG-PIA CAR)