LEGAZPI CITY (PIA5/Albay) — Pinangunahan ng Small Business Corporation (SBCorp) kasama ang Department of Trade and Industry (DTI) ang 2023 SBCorp Regional Roadshow sa lalawigan ng Albay, nitong Martes, Mayo 16.

Lumahok sa naturang aktibidad ang 200 indibidwal na kabilang sa Micro Small Medium Enterprises (MSME’s) o financial institutions sa Albay.

Layunin ng SBCorp na mabigyan ng tulong pinansyal ang mga MSME’s sa pamamagitan ng inaalok nilang loan programs, gaya ng RISE UP at Wholesale Microfinance programs na nakatutok sa Pondo sa Pagbabago at Pag-asenso (P3)-funded component.

‘’Maaaring umutang ang mga bagong borrowers ng up to P3 million maximum loanable amount at para naman sa mga dati nang borrowers, sila ay makakahiram ng up to P10 Million na may 1.0% diminishing balance interest rate kada buwan. The loan term is payable monthly up to three years,’’ saad ni SBCorp Communication Department CEO III Eloisa Isip.

‘’Maluwag po kami sa pagpapautang, kakaunti ang requirements hanggat kaya namin na maging flexible,’’ saad ni SBCorp Innovation and Advocay Group Head Wally Don Calderon.

‘’Kasi po [ang] mandato namin ay development financing, at the end of the day gusto namin na makatulong sa MSMEs as a sector and to the country,’’ dagdag pa niya.

Ang SBCorp ay isang non-bank government financial institution na nabuo noong 1991 sa ilalim ng Magna Carta para sa MSME’s.

Ayon kay Calderon sa 20 taon ng SBC, P10 billion ang dapat na capitalization ng kanilang korporasyon subalit nitong 2021 lang ibinigay ng gobyerno ang halangang ito.

Dagdag pa ni Calderon, dahil naging matagumpay ang kanilang mga programa nitong nakaraang pandemya, nabigyan ang SBCorp ng dagdag na pondo.

‘’Napagkatiwalaan ang aming korporasyon at binigyan [kami ng] full capitalization, nag-download ang gobyerno ng additional P8.08 Billion at kaya po fully capitalize ang SBCorp dahil meron na po kaming P10 billion capitalization,’’ saad ni Calderon.

‘’Iniikot po namin [ang ilang rehiyon o lalawigan] dahil meron po talaga kaming pundo na kayang ipautang whether directly to the MSME’s or to prospective partner financial institutions,’’ dagdag pa niya.

Nagbigay rin ng mensahe si DTI Bicol Regional Director Dindo Nabol sa mga dumalo sa nasabing aktibidad lalo na sa mga MSME’s.

‘’Ang kaibahan ng SBCorp over the other financing institution is that, they have low interest rate medyo lenient ang kanilang requirements, no collateral requirement but it is hard to borrow money nowadays kasi you need to prove your track record,’’ saad ni Nabol.

Binigyang diin ni Nabol na dapat ayusin ng borrowers ang kanilang track record upang mas mapadali ang proseso ng mga dokumento.

‘’You need to prove that you have the capability to manage the funds that is lended to you,’’ dagdag pa niya.

‘’We encourage you to avail all the financing programs and services of SBCorp with directive from them for their conduits para happy tayo lahat, yung problema niyo sa inyong mga negosyo ay masagot,’’ saad ni Nabol.

Ang mga interesadong loan borrowers ay maaaring makipag-ugnayan sa kanilang tanggapan upang mabigyan ng kinakailangang tulong. (PIA5/Albay)