SYUDAD SANG ILOILO (PIA) -- Gin-aprubahan ni Department of Budget and Management (DBM) Tiglikum Amenah F. Pangandaman sadtong Mayo 15, 2023 ang pagpaguwa sang pondo nga nagalab-ot sa P15,151,709,646.00 para sa pagpatukod sang 4,912 nga mga hulot-klasehan sa 1,194 ka mga lugar sa bilog nga pungsod.

Ginpahayag ni Pangandaman nga ang nagakapanahon nga pagpaguwa sang pondo nga ginhinyo sang Department of Public Works and Highways (DPWH) kag Department of Education (DepEd) nagapakita nga wala nagapangalag-ag ang administrasyon ni Pangulong Ferdinand R. Marcos, Jr. nga magpuhunan sa edukasyon.  Kinahanglan nga magtukod kag magkaayo sang mga classroom agud makasunod sa pagtaas sang numero sang enrollment sa mga pampubliko nga buluthuan.

Nagalab-ot ang kabilugan nga kantidad sang konstruksyon sa P15,020,282,176.00. Kaupod na diri ang pagtukod, pagbaylo kag pagkumpleto sang mga kindergarten, elementary kag mga secondary school building kag technical vocational laboratories; pagpahamtang ukon pagbaylo sang disability access facilities; pagpahimo sang water kag sanitation facilities; kag site improvement.

Sa pihak nga bahin, yara sa P131,427,470.00 ang pagagamiton para sa gastuson sa Engineering and Administrative Overhead (EAO). Kalakip diri ang pagkuha sang mga tawo; paghimo sang preliminary kag detailed engineering activities; pre-construction activities; construction project management; testing kag quality control; acquisition, rehabilitation kag repair sang related equipment kag parts; training, communication, per diem, kag transportation expenses; kag contingencies nga may kahilabtanan sa pre-construction activities. (AAL/LAF/DBM)