DAKBAYAN SA MARAWI, Lanao del Sur (PIA)--Pormal nga giturn-over sa National Housing Authority (NHA) ang mga permanent housing unit sa 254 ka pamilya nga nawad-an og pinuy-anan tungod sa Marawi siege niadtong 2017.
Ang yuta gipalit ug gipalambo sa NHA samtang ang mga balay gitukod sa Pangagamhanan sa Marawi City ug sa Provincial Government sa Lanao del Sur.
"We have completed 682 permanent housing units in partnership with the city government of Marawi and the provincial government of Lanao del Sur and today we are going to award 254 permanent houses," matod ni NHA-9 ug BARMM Regional Manager Al-Khwarizmi Indanan atol sa gipahigayong turn over niadtong Mayo 17.
(Nakompleto na nato ang 682 ka permanente nga housing units sa pakigtambayayong sa City Government of Marawi ug sa Provincial Government of Lanao del Sur ug karong adlawa ihatag namo ang 254 ka permanenteng balay)
Ang mga housing unit nahimutang sa Pamayandeg Ranao Residences sa Dansalan (PRRD) sa Barangay Kilala.
Matod pa ni Indanan, ilang tuyo nga maghatag ug 100 ka permanenteng puy-anan matag semana human niana aron ang mga bakwit makasugod og bag-ong kinabuhi sa ilang bag-ong mga panimalay.
Dugang pa niya, pahibaw-on daan nila ang mga makadawat tungod kay gikinahanglan sila nga mohimo og social preparations sa dili pa sila maka-okupar sa ilang mga permanenteng balay.
Ang paghatag og permament shelters maoy usa sa mga highlight sa Marawi Week of Peace celebration karong tuiga. Kini gitambungan ni Department of Human Settlements and Urban Development (DHSUD) Assistance Secretary (Asec) Melissa Aradanas, Task Force Bangon Marawi (TFBM) Field Office Manager Asec. Felix Castro, ug City Mayor Majul Gandamra nga nipahinumdom sa mga nakadawat nga atimanon pag-ayo ang mga kabalayan kay libre kini nga gihatag sa gobyerno. (PIA-10/Lanao del Sur)
