TAGBILARAN CITY, Bohol, May 8 (PIA) -- Walay overdose sa bakuna.

Tungod niini, bisan kon nahuman na og bakuna ang mga bata, gi-aghat pa gihapon nga mosalmot sa libreng pamakuna sa Chikiting Ligtas nga gidumala sa Department of Health (DOH) inabangan sa mga local nga kagamhanan.

Kini usab maoy gipasabut ni Department of Health (DOH) Bohol Team Leader Dr. Portia Reyes, kang kinsa nga ahensya maoy nanguna sa kampanya sa pag-apas sa naputol nga pamakuna sa mga kabataan nga bag-ong gihimugso ngadto sa 59 ka buwan.

Ang pagka-undang sa pamahuna sa mga kabataan aron mapanalipdan sa sakit nga polio, tipdas ug rubella, nahitabo tungod sa restrictions sa panahon sa pandemya ug sa kahadlok sa mga ginikanan nga modala sa ilang mga anak ngadto sa mga health centers diin usab giatiman ang mga may COVID.

Sa tulo ka tuig ga napa-undang ang pamakuna, namatikdan usab ang pagbalik sa polio ug tipdas, mga sakit nga may delikado nga komplikasyon sa mga kabataan.

Sukad sa 1976 o human na sa 30 ka tuig, wala na untay kaso sa polio sa Pilipinas, apan niining bag-o pa lamang, masuta sa DOH nga may nakompirmar silang kagaw sa polio nga nakuha sa usa sa mga bodies of water sa Visayas.

Ang polio usa ka sakit nga makatakod ug ang kagaw nga kina-ingan niini, moatake sa dugukan sa tawo nga maoy kina-ingnan sa pagkalulid hangtud sa hangtud. Kon magrabehan, mahimong kamatayon ang dangatan sa pasyente nga matakdan.

Sa laing bahin, ang tipdas, kon maka-takod sa bata, maoy kina-ingnan sa tag-as nga hilanat nga mahimong molahos sa pagkabuta o magkabroncho pneumonia.

Ang rubella usab, kon makaatake sa bata, magkaproblema kini sa congenital diseases.

Ang tulo ka mga sakit, wala may tambala pan mahimo kining pugngan pinaagi sa bakuna.

Niini, gilusad sa DOH ang Chikiting Ligtas, Catchup Special Supplemental Immunization Activity aron apson ang mga kabataan nga wala mabakunahi tungod sa pandemic.

Gani, butyag sa DOH, bisan kadtong nakakuha nag bakuna, apil na usab sa special supplemental immunization activity.

Duha ka bakuna ang ihatag nga libre: oral polio vaccine nga ipatulo sa dila sa bata ug ang batok sa tipdas ug rubella nga itupok sa bata.

Niini, miaghat ang mga health authorities ngadto sa mga ginikanan sa mga kabataan nga anaa sa 0-59 months old sa pag-adto sa mga vaccination centers nga naa sa mga kalungsuran ug barangay halls, aron kahatagan ang mga bata sa libreng bakuna. (RAHC/PIA7 Bohol)