DAKBAYAN SA MARAWI, Lanao del Sur (PIA)--Nagpasalamat ang 254 ka pamilya nga nakadawat og permanent housing units sa Barangay Kilala niining dakbayan ngadto sa gobyerno tungod kay aduna na silay kapuy-an nga matawag nila nga ilang kaugalingon.

Ang pipila niini nga mga pamilya nanimuyo sa mga tolda ug temporaryo nga mga puy-anan samtang ang uban nagpabilin sa ilang mga paryente sa kasikbit nga mga lungsod ug probinsya pagkahuman naguba ang ilang mga balay panahon sa pag-atake niadtong 2017.

"Sobrang saya dahil kahit papaano ay makikita ko na yung bahay na nawala sa amin. Napalitan na ng gobyerno at maganda ang bahay. Kasya na sa aming pamilya, malawak siya. Maraming-maraming salamat," matod ni Muslimah Lala Abdullah.

(Lipay kaayo ko kay makit-an na nako ang balay nga nawala namo. Gipulihan na sa gobyerno ug nindot nga balay. Lapad ug haom kini sa among pamilya. Salamat kaayo)

Dako usab ang kalipay ni Norjanah Dangcal, single parent nga adunay walo ka mga anak ilabi na nga dili na kini makauli sa iyang panimalay sa Most Affected Area tungod kay usa kini sa mga reclaimed area.

"Ngayon na sinabi ni Mayor na kasali ako ang saya-saya ko. Sasabihin ko sa mga anak ko na may titirahan na kami," matod niya.

(Karon nga giingon sa Mayor nga usa ako sa mga nakadawat, nalipay kaayo ako. Sultihan ko ang akong mga anak nga aduna na miy kapuy-an)

Gawas kang City Mayor Majul Gandamra, gipasalamatan usab ni Dangcal ang Task Force Bangon Marawi, ang National Housing Authority, ug ang tanan nga apil sa pagtukod sa permanenteng puy-anan.

"Sana masuklian namin ang kabaitan ninyo. Hihilingin ko sa Diyos na magtagumpay kayo sa mga ginagawa niyo na yung tulad ko na maraming anak, walang asawa nabigyan niyo ng kasiyahan. Maraming-maraming salamat sa inyo. Hindi ko ito makakalimutan," dugang pa niya.

(Nanghinaut ko nga makabalos kami sa inyong kaayo. Mangayo ko sa Diyos nga molampos mo sa inyong ginabuhat. Gihatagan ninyo og kalipay ang mga sama kanako nga adunay daghang mga anak ug nag-inusarang ginikanan. Salamat kaayo. Dili ko kini makalimtan)

Ang gobyerno, pinaagi sa National Housing Authority ug mga local government units sa Marawi City ug Lanao del Sur, nihatag ug permanenteng housing units ngadto sa 254 ka mga bakwit, Mayo 17, isip kabahin sa Marawi Week of Peace celebration. (PIA-10 Lanao del Sur)