DAKBAYAN SA MARAWI, Lanao del Sur (PIA)--Ang paghuman sa integrated school buildings sa Barangay Moncado Kadingilan dinhi repleksyon sa determinasyon sa pagpauswag sa mas maayong edukasyon sa dakbayan, matod sa Department of Education (DepEd).

Si DepEd Disaster Risk Reduction and Management Services (DRRMS) Director Lawyer Christian Rivero nipasabot nga samtang gipakita sa maong proyekto ang lig-on nga panagtambayayong sa iyang buhatan ug sa Department of Public Works and Highways (DPWH)-10, nagpakita usab kini sa pagkamalahutayon sa gobyerno ug mga magtutudlo aron mapadayon nga edukado ang tanang estudyante sa lokalidad.

"Ang building na ito is a testament ng ating partnership. More than that, it is also a testament to our courage, tenacity, and passion to rebuild better and continue education," ingon niya.

(Kini nga building usa ka testamento sa atong partnership. Labaw pa niana, kini usab usa ka testamento sa atong kaisog, kalig-on, ug kadasig sa pagtukod pag-usab sa mas maayo ug pagpadayon sa edukasyon)

Si Rivero namahayag usab nga nakadayeg siya sa klaro nga pagkahimo ug disenyo sa pagtukod sa eskwelahan. Nunot niini, si Rivero nipadayag sa iyang tinguha nga mahimo nang operational sa labing daling panahon ang tunghaan.

Gusto usab niya nga ang mga building luwas alang sa tanan nga mga estudyante, ingon nga kinahanglan adunay koral ug mga agianan kinahanglan magpabilin nga wala’y peligro.

Uyon niini, ang kagamhanan sa dakbayan sa Marawi mipasalig nga paluyohan niini ang DepEd sa pagduso sa ilang tumong alang sa integrated school building. (PIA-10/Lanao del Sur)