TAGBILARAN CITY, Bohol, May 26 (PIA) -- Nagkadaiyang stakeholders ang nagtanom og 17,500 ka Rhizophora sp. propagules atol sa usa ka simultaneous mangrove tree-planting program sa lungsod sa Loon ug Talibon niadtong Biyernes, Mayo 26, 2023.
Kini isip pagsaulog sa Month of the Ocean diin kini nga inisyatiba gipangunahan sa Provincial Government of Bohol (PGBh), pinaagi sa Bohol Provincial Environment Office (BPEMO), uban sa Department of Environment and Natural Resources (DENR) Bohol.
Kabahin kini nga kalihokan sa Trees for Unity Program ni Gobernador Erico Aristotle Aumentado nga usa ka programa nga nagpalihok sa mga Boholano sa pag-apil sa ilang kaugalingon sa pagpreserbar sa kinaiyahan pinaagi sa pagpananom og kahoy.
Kinatibuk-ang 7,500 ka propagules ang gitanom sa 346 ka stakeholders sa Loon Uplifted MarineTerraces, usa ka giila nga geosite nga bahin sa Bohol Island Global Geopark sa Barangay Basdaku, lungsod sa Loon.
Samtang, 10,000 ka propagules usab ang gitanom sa Barangay Sto. Nino, lungsod sa Talibon sa 174 ka stakeholders.
Ang Trees for Unity Program ubos sa Strategic Change and Development Agenda sa PGBh ubos sa Environmental Sustainability, nga nagtumong sa paghimo sa usa ka lig-on ug berde nga Bohol pinaagi sa pagpatuman sa maayong mga programa sa kinaiyahan. (EBC/PIA7 Bohol)
