TAGBILARAN CITY, Bohol, May 25 (PIA) -- Ang Office of Civil Defense (OCD) nipagawas og pamahayag nga nag-awhag sa mga social media users o netizens sa pagsusi sa mga post bahin sa super typhoon ‘Mawar’.

Buot ipahibalo sa OCD sa publiko nga base sa pinakaulahing weather forecast sa Department of Science and Technology-Philippine Atmospheric, Geophysical and Astronomical Services Administration (DOST-PAGASA), ang super typhoon ‘Mawar’ dili mo-landfall sa nasod bisan pa man sa pagsulod niini sa Philippine Area of ​​Responsibility (PAR) karong Biyernes o Sabado.

Kini usa ka paningkamot sa buhatan aron matul-id ang mga mensahe sa social media bahin sa kakusog sa bagyo ug aron malikayan ang kalibog ug kalisang sa kadaghanan sa publiko.

Matud pa sa OCD, ang gipaabot nga pag-ulan nga mahimong masinati gikan sa Domingo tungod sa kusog nga ‘Habagat’ o Southwest Monsoon, ug mahimong makaapekto sa Kasadpang bahin sa nasud.

Giklaro sa OCD nga wala sila maghatag og bisan unsang mga pagpangandam nga kinahanglan buhaton kalabot sa kasamok sa panahon, apan kini aron matul-id ang naglibot nga mensahe sa Facebook bahin sa giingong grabe nga epekto sa super typhoon.

Gi-awhag sa buhatan ang mga netizens ug ang publiko nga likayan ang pagpa-ambit sa maong mga mensahe ug mosalig sa mga kasaligang ahensya alang sa impormasyon.

Gihangyo usab sa OCD ang tanan sa paggamit sa social media nga responsable aron malikayan ang kalibog ug kalisang. (ECB/PIA7-Bohol)