TUBOD, Lanao del Norte (PIA)--Kapin 800 ka Agrarian Reform Beneficiaries (ARBs) gikan sa lain-laing lungsod sa probinsya sa Lanao del Norte ug Misamis Occidental ang nakadawat na sa ilang dugay nang gipaabot nga Certificates of Land Ownership Awards (CLOA) ug electronic Titles (e-Titles)  pinaagi sa Support to Parcelization of Land Titles (SPLIT) nga proyekto sa Department of Agrarian Reform (DAR).

Sa Lanao del Norte, 302 ka ARBs ang nahatagan og 304 ka CLOA nga naglangkob sa 529 ka ektarya nga yuta, samtang 75 ka ARBs ang nakadawat og 81 ka e-titles alang sa 131 ka ektarya nga yuta. Sa Misamis Occidental, 234 ka ARB ang nakadawat og 252 ka CLOA alang sa 220 ka ektarya nga yuta, ug 196 ka ARB ang nakadawat og 194 ka e-titles alang sa 155 ka ektarya nga yuta.

Gibutyag ni Agrarian Reform Secretary Conrado M. Estrella III nga hapit na pirmahan ni President Ferdinand Marcos, Jr. ang New Agrarian Emancipation Bill, diin i-condone na ang tanang loan, interest, multa, ug dugang nga mga bayran alang sa alokasyon sa agrikultural nga yuta ubos sa Comprehensive Agrarian Reform Program (CARP).  

“Pangarap po ng ating pangulo ang pamimigay ng lupa sa inyo na mga agrarian reform beneficiaries. Wala na kayong aasikasuhin na utang. At imbis na ibabayad niyo sa utang ninyo dahil sa lupa, ‘yan ay gamitin ninyong karagdagang kapital sa pagsasaka at gamitin din niyo sa pamilya ninyo. Malapit ng pirmahan ng ating ating pangulo ang tinatawag na New Agrarian Emancipation Act na isasabatas na. Ang inyong matatanggap na titulo ay libre na po, wala na kayong bababayaran sa titulong yan,” sumala ni Estrella.  

Samtang, dako ang pagpasalamat sa ARBs tungod kay nakuha na nila ang titulo sa ilang yuta human sa pipila ka tuig.

"Sa ngalan sa mga beneficiaries namo, salamat kaayo sa DAR, sa national, sa probinsya, ug dire sa lokal. Salamat kaayo sa atong halangdong Presidente Bongbong Marcos, Jr. Salamat kaayo nga sa kadugay nga panahon nadawat ra gyod sa among mga beneficiaries ang ilang certificate of land ownership award,” miingon si Efren Mulato Villacrusis sa La Libertad Farmers Cooperative in Lanao del Norte.

Samtang si Lluch Benedict Halibas nga taga Mala-igang Digkilaan, Iligan City, nipadayag usab sa iyang pasalamat sa DAR nga nakadawat sila og legal nga pagpanag-iya human sa kapin 10 ka tuig nga pag-uma. Ang matag tawo sa ilang grupo makadawat ug mga tulo ka ektarya nga yuta, ug ang mga tanom nga gipatubo sa yuta naglakip sa mga lubi, mais, saging, ug mga utanon.

Gipahayag usab ni Lanao del Norte Governor Imelda "Angging" Dela Cruz Quibranza ang mahinungdanong papel sa mga mag-uuma sa ekonomiya sa probinsiya, diin ang 44% sa yuta gipahinungod sa agrikultura. Sumala niya, kining lakang sa DAR usa ka mahinungdanong lakang sa pagsuporta sa mga mag-uuma ug pagpalambo sa pagtubo sa sektor sa agrikultura sa rehiyon.

Misaksi usab si Senador Francis Tolentino sa seremonyal nga pag-apod-apod ug iyang gipasabaot ang kamahinungdanon sa kalampusan isip pagpakita sa makanunayon nga suporta sa gobyerno sa mga mag-uuma nga Pilipino. Gihatagan usab og gibug-aton sa senador ang panginahanglan sa pagpauswag sa access sa modernong kagamitan sa panguma ug teknolohiya alang sa mga lokal nga mag-uuma aron epektibong makigkompetensya sa mga imported nga produkto. (LELA/PIA-10/Lanao del Norte)