ILIGAN CITY (PIA)--Sa tinguha nga mapugngan ang pagkuyanap sa measles-rubella ug polio, gilusad sa Department of Health (DOH)-10  ang "Chikiting Ligtas," sa dakbayan sa Iligan, kauban ang ubang ahensya, ang katibuk-ang kampanya sa nasud alang sa bulan sa Mayo.

Ang programa nagtanyag og libreng supplemental immunization alang sa mga bata nga nag-edad og 9-59 ka bulan aron malikayan ang tipdas og rubella virus samtang ang mga bata nga nag-edad og 0-59 ka bulan hatagan og oral vaccines aron malikayan ang pagkaylap sa polio virus.

Nihatag ug gibug-aton si Acting City Health Officer Dr. Glenn L. Manarpaac sa kamahinungdanon sa kalihokan aron malikayan ang mga sakit, ug nagpasalamat sa mga ginikanan ug uban pang partner nga ahensya sa pag-apil sa kampanya. Ang kalihokan nagtumong sa pagpanalipod sa mga bata batok sa measles-rubella ug polio, nga parehong walay tambal sa pagkakaron, apan mahimong mapugngan pinaagi sa pagbakuna.

“Ang atong Measles-Rubella Oral Polio vaccine supplemental immunization activity isa sa napaka-importante nga activity para ma-prevent nato ang diseases nga Measles-Rubella ug kaning polio," sumala ni Manarpaac.

Samtang, si Relief International Regional Coordinator Lourdes Grace Diasana, niawhag sa mga ginikanan, tigbantay, ug ubang caregivers nga suportahan ang programa ug pabakunahan ang ilang mga anak. Gipasalig niya nga libre, epektibo, ug luwas ang mga bakuna.

“Sa mga ginikanan, kadtong tig-bantay ug bata, mga lolo, lola, uncle, aunte, yaya, gi-awhag nako kamo nga atong suportahan ang pagpamakuna sa mga bata edad 0-59 months or kadtong mga bata nga wala pay five years old. Para kini ma-protektahan sila laban sa Measles-Rubella ug polio. Kini nga mga sakit walay tambal ug ang bakuna nato kay libre, epektibo ug luwas kini alang sa mga sakit nga gina-prevent sama sa Measles-Rubella and polio," sumala niya.

Dugang pa, si Dr. Steffi Grace H. Enon, ang local health division cluster sa DOH, miingon nga ang mga bakuna maoy magpugong sa pagkaylap sa mga sakit.

Si Jean Artajo, usa ka inahan sa duha ka bata, nagpahayag sa iyang pagpasalamat sa libre nga pagbakuna.

“Sa uban, ato lang pamalandungon nga ang ilang gipanghatag sa ato alang sa kaayohan. So, magpabakuna kita sa atong mga anak,” sumala ni Artajo.

Tumong sa maong programa nga mabakunahan ang 95% sa mga bata sa dakbayan og giawhag usab ang uban pang mga ginikanan ug guardian sa pag-apil aron masiguro nga ang ilang mga anak mapanalipdan batok sa measles-rubella ug oral polio. (LELA/PIA-10/Lanao del Norte)