CORTES, Bohol, May 23 (PIA) -- Magpista apan wala pay ihawon nga lapa-on ug lechonon? Walay problema, tamdi kining giya nga nakuha gikan sa taho sa Live Hog ang Pork Price Bulletin nga regular nga gimantala sa Office of the Provincial Veterinarian (OPV) ubos ni Dr. Stella Marie Lapiz.  

Kon taga unang Distrito ka ug buot kang mopalit og baboy ihawon nga imong lapa-on, adto sa Catigbian ug Balilihan pamalit kay tag P160 ang matag kilo sa ihawon nga mapalit didto, kon itandi sa tag P190 ang kilo kon adto mopalit og buhi nga baboy sa Tubigon.

Kon taga Segundo Distrito ka, adto og tuyo sa San Isidro ug sa Clarin kay tag P160 ang kilo sa buhi nga baboy didto, kon itandi sa Talibon nga tag P230 ang kilo sa buhi.

Kon taga Tersero Distrito ka, adto pangitag baboy ihawon sa Loay, makapalit kag tag P160 ang kilo didto, kon itandi sa tag P200 ang kilo kona dto ka mopalit sa Valencia ug sa Candijay.

Kon taga Unang Distrito, labing maayo adto sa Calape palit kay tag P170 ra ang kilo sa ilang aslonon, kon itandi sa tag P300 ang kilo kon adto ka sa Panglao ug Baclayon mamalit.

Sa ikaduhang Distrito, sa aslonon, makabarato ka sa Clarin kay nay tag P240 ang kilo didto kon itandi sa Talibon ug Bien Unido nga tag P300 daan ang kilo.

Sa Ikatulong Distrito, basta lechonon, adto palit sa Alicia, Bilar, Dimiao, Garcia Hernandez, Loay, Loboc, Mabini og Sevilla kay tag P250 ang kilo sa buhi nga aslonon didto, kon itandi sa tag P300 ang kilo sa Carmen.

Sa presyo sa nilapa nga karne sa kamerkadohan, sa First District, adto pangumpra sa Balilihan o Catigbian kay makapalit kag atg P290 ang kilo sa karne kon itandi sa Tubigon nga mapalit kin isa tag P340 ang kilo.

Sa ikaduhang Distrito, kinabaratohan nga karne sa mercado nga imong mapalit, adto sa Anda kay tag P300 ang kilo sa karne, kon itandi sa Mabini nga tag P350.

Kon dinhi sa Tagbilaran mamalit, sa Cogon market ka makapalit sa kinabaratohan: P300 ang lomo ug P300 usab ang tiyan sa baboy, kon itandi sa laing mercado nga naa sa P330 ang lomo, ham ug tijan.

Kon sa mall ka ganahan mamalit, may mall nga namaligya og lomo sa tag P308 ang kilo, ug P335 ang tiyan sa baboy, kon itandi sa labong taas nga P325 ug P365 ang kilo.

Ang monitoring sa presyo sa buhi ug nilapa nga karne sa bably, gihimo sa OPV niadtong Mayo 19, samtang lain na usab nga survey monitoring data ang iplastada sa dili madugay.

Sa Bohol, gumikan sa hilga sa African Swine Fever (ASF), bisan kon hugot nga gipanalipdan ang pagsulod sa buhi ug karne nga mahimong magdala og sakit, nagpadayon nga competitive ang presyo sa baboy, bisan paman nga nagkamahal na usab ang lawog ug nagkahinit ang raw materials sa paghimo og lawog sa Bohol.

Kini kay wala nay raw materials nga gipasulod sa Bohol, ilabi na og gikan o bisan nag ani kon molabay ra sa lugar nga may ASF. (RAHC/PIA7 Bohol)