MAMBAJAO, Camiguin (PIA)--Baynte singko ka mga iskolar sa housekeeping NC II ang misalmot sa Training Induction Program, Hunyo 1, sa Camiguin School of Arts and Trades (CSAT), Lumad, Poblacion, dinhi.

"Kini usa ka scholarship ubos sa Training for Work Scholarship Program nga nagtumong nga matabangan ang mga benepisyaryo nga makakuha og skills training ug aron makakita og trabaho," miingon si Vocational School Administrator sa CSAT Karol Sanggomay.

Atol sa pagbansay-bansay, ang mga scholar makadawat og training support fund nga nagkantidad og P160 kada adlaw. Ang pagbansay ipahigayon sulod sa 55 ka adlaw, ug pagkahuman, ang mga iskolar makakuha og sertipiko sa pagbansay ingon man moagi sa usa ka training assessment.

Mapasalamaton sa kahigayonan, si Roceleen Ysa Mae Abuzo, 39, taga Poblacion, Mambajao, nga usa sa mga benepisyaryo niingon nga tukma sa panahon ang pagbansay-bansay sanglit nangita na siya og employer sa gawas sa nasod, nga nagkinahanglan og NC II certificate.

“Kini siya opportunity and tabang bitaw pud nga dili makaingon nga adto sa school pero naa bitaw sila nga makatabang sa atoa para mainput ang knowledge then skills pud sa atoa nga in the future, nga gusto gyud ta mulambo sa atong kaugalingon, naa ang school or naa ang TESDA para bitaw nga muagupay para sa atoa," giingon ni Abuzo.

Ang mga benepisyaryo naglakip sa mga displaced nga mga trabahante tungod sa pandemya, mga bag-ong high school graduates, ug mga gradwado sa kolehiyo nga gustong manimpalad sa pagtrabaho sa gawas sa nasud. (RTP/PIA-10/Camiguin)