MARAWI CITY, Lanao del Sur (PIA)--Nahimong pioneer local government unit ang lungsod sa Piagapo sa lalawigan sa Lanao del Sur nga matagamtaman ang bag-ong advanced digitalization sa tibuok Bangsamoro Autonomous Region in Muslim Mindanao (BARMM).
Kini, sa dihang gilusad sa Ministry of the Interior and Local Government (MILG), uban ang provincial government sa Lanao del Sur, local government sa Piagapo, ug ang United Nations Development Programme (UNDP), ang labing unang Digital Bangsamoro Center sa rehiyon ubos sa Localized E-Governance for the Accelerated Provision of Services (LEAPS) Program, Mayo 31.
Matod ni MILG Operation Management Services Director Fausiah Romancap-Abdula, dili sayon ang pagtukod sa digital center ug niabot sila og duha ka tuig aron kini mahitabo tungod sa coronavirus disease (COVID)-19 pandemic, ug pipila ka internal nga mga hagit sama sa kausaban sa mga service providers, ug pagpalit sa hardware ug uban pang kagamitan.
Sa katumanan sa ilang paningkamot, gipasiugda niya nga kini karon magpasabot sa pagsugod sa pagtubag sa digital nga mga panginahanglanon ug sa katumanan sa ilang tumong nga mao ang pagpadayon sa usa ka kasaligan nga pagdumala ug pagdala sa makahuluganong mga serbisyo pinaagi sa digital transformation aron makab-ot ang usa ka empowered Bangsamoro.
Gibutyag ni Abdula nga una nilang giablihan ang duha ka serbisyo, lakip ang pagkuha sa business permits ug civil registry documents sama sa birth certificates. Kini, sumala niini, pasimplehon aron mahimong hapsay, episyente, ug dali nga ma-access sa mga konstituwente.
"We hope to further foster and inspire transformation in service delivery practice. Ultimately, we want government services to be accessible to the people in the region, especially those who are less privileged and marginalized, as we empower them for e-governance," matod niya.
(Kami nanghinaut nga mas mapalambo ug madasig ang pagbag-o sa praktis sa paghatag serbisyo. Sa katapusan, gusto namo nga ang mga serbisyo sa gobyerno mahimong ma-access sa mga tawo sa rehiyon, labi na sa mga dili kaayo pribilihiyo ug marginalized, samtang gihatagan namon sila gahum alang sa e-governance)
Si Abdula mipasalig usab nga ang rehiyonal nga gobyerno pinaagi sa MILG ug UNDP mohatag og hingpit nga suporta hangtod nga ang tanang gikinahanglang serbisyo andam na nga magamit sa mga lokal.
Samtang, si UNDP Resident Representative to the Philippines Dr. Selva Ramachandran nipaabot nga ang pagtukod sa digital center sa lungsod sa Piagapo maoy una sa BARMM, ug dili kini ang kataposang higayon nga iduso ang maong paningkamot.
Gihatagan niya og gibug-aton nga kini ang produkto sa ilang pag-ila nga ang gobyerno kinahanglan nga maghatag digitalized nga mga serbisyo, makahimo sa pag-access sa mga interbensyon ug proteksyon sa katilingban, ug magamit, transparent, tulubagon ug epektibo nga mga paagi.
Gisubli usab ni Ramachandran ang ilang panguna nga misyon nga mao ang pagkab-ot sa digital nga pag-uswag sa BARMM nga wala’y ibilin, ug labi nga pagpadali sa koneksyon sa mga komunidad aron mahatagan ang mga lungsuranon sa pagpahimulos sa mga benepisyo sa digitalization. (PIA Lanao del Sur)
