TAGBILARAN CITY, Bohol, June 5 (PIA) -- Human mapugngan sa Bureau of Immigration (BI) ang pipila ka mga Pilipino nga makagawas sa nasud tungod sa bogus overseas employment certificates, nipasidaan ang BI batok sa pekeng OECs nga gibaligya online.

“Our system is integrated with the [Department of Migrant Workers’] database, hence it is very easy for us to verify legitimate OECs. Using these fake certificates will no longer work,” matud pa sa gipagawas nga pahayag ni BI Commissioner Norman Tansingco.

Nipagawas og pasidaan ang buhatan human mababagan sa ilang Travel Control and Enforcement Unit (TCEU) niadtong niaging semana ang tulo  ka biktima nga paingon unta sa Warsaw, Poland, sa Ninoy Aquino International Airport Terminal 1.

Giingong sigun sa mga biktima nga usa  ka babae ug duha  ka lalaki nga parehong naa sa pangedaron nga 30 anyos pataas, nga gi-recruit sila online pinaagi sa messaging app.

Matud pa nga nibayad sila og halos tig-P70,000 alang sa recruitment ug ilang ticket.

Nibayad usab sila og dugang P7,000, nga giingong alang sa pagproseso sa ilang OECs.

Giingong nadawat nila ang OECs pinaagi sa email.

Gipasusi kini sa primary inspector sa BI sa TCEU, nga nagkumpirma nga peke ang OECs.

Gawas niini, pipila pa ka kaso sa pekeng OECs ang natala sa BI ning bag-o lang. (ECB/PIA7 Bohol)