NABUNTURAN, Davao de Oro (PIA) - - Mokabat sa 1,120 ka mga displaced, underemployed, ug seasonal nga mga trabahante, kasagaran mga mag-uuma, ang nakadawat niadtong Mayo 31, og kinatibuk-ang P4.96 milyones nga cash assistance gikan sa Department of Labor and Employment (DOLE).
Ubos sa Tulong Panghanapbuhay sa Ating Disadvantaged/Displaced Workers (TUPAD), nakadawat ang kada benepisyaryo og P4,430 isip bayad sa ilang hinanali nga trabaho.
Gidasig ni DOLE Davao de Oro provincial director Niel Allan Baban ang mga benepisyaryo nga tabangan usab ang ilang kaugalingon sa pagpalambo sa ilang kahimtang sa kinabuhi.
“Magtinabangay ta. Dili tanan panahon naa ang gobyerno. Kamo pud ang motabang sa inyong kaugalingon,” ingon niya.
Gipahigayon ang payout sa Children’s Park Pavilion sa Davao de Oro Provincial Capitol Compound.
Gawas sa TUPAD payout, 21 ka lokal nga asosasyon sa mga mag-uuma, kooperatiba, ug mga pribadong establisemento ang nagbaligya sa ilang mga produkto sa maong dapit pinaagi sa usa ka adlaw nga "Kadiwa sa Pangulo para sa Pilipinong Manggagawa."
Apil sa mga gibaligya mao ang mga produkto sa agrikultura sama sa mga utanon, prutas, isda, ug dairy; kakanin; mga panapton ug mga sapot. (JMFE/MLU/PIA Davao de Oro)
