LEGAZPI CITY, ALBAY (PIA) -- Kinumpirma ni Philippine Institute of Volcanology and Seismology (PHIVOLCS) Albay Resident Volcanologist Dr. Paul Alanis ang patuloy na pagtaas ng aktibidad ng Bulkang Mayon, kasama na ang pagdami ng rock falls.

"Malalaking bato ang nahuhulog, which means that patuloy yung pressure sa ilalim na nagtutulak doon sa lava dome," saad niya.

Itinaas ng PHIVOLCS ngayong 12:00 ng tanghali ang Alert Level 3 sa Bulkang Mayon dahil sa "increased tendency towards a hazardous eruption mula  sa pagdeklara nito sa Alert Level 2 nitong Hunyo 5.

"This means that the Mayon is exhibiting magmatic eruption of a summit lava dome, with increased chances of lava flows and hazardous Pyroclastic Density Currents (PDCs) affecting the upper to middle slopes of the volcano and of potential explosive activity within weeks or even days," saad sa PHIVOLCS Mayon Volcano bulletin.

Posibleng pagsabog

Ani Alanis, bagamat hindi pa matutukoy kung kailan ang posibleng pagsabog ng bulkan, dalawang scenario ang maaaring mangyari.

"Sa unang scenario baka nag iipon lang ng lakas ang Mayon na magkaroon tayo ng malaking eruption. Second scenario baka naman tahimik lang na maglalabas ng volcanic materials,'' saad ni Alanis.

Aniya, sa ngayon ay nagpapatuloy ang panganib na dala ng rock fall at iba pang pyroclastic flows mula sa lava dome.

Kanya na ring inirekomenda ang agarang evacuation ng mga natitirang residente at mahigpit na pagbabawal sa pagpasok at anumang aktibidad sa 6-kilometer PDZ.

“Dahil Alert Level 3 na, nagrecommend na po kami ng agarang evacuation kung may natitira pang residente sa 6-kilometer PDZ, at huwag na din pong magpapapasok sa area.

Nakasaad din sa PHIVOLCS bulletin ang posibilidad ng ash fall events sa Southern side ng bulkan dahil sa kasalukuyang wind pattern.

Walang crater glow at phreatic eruption

Nilinaw din ni Alanis na walang naitalang phreatic eruption nitong umaga, taliwas sa mga kumakalat na mga litrato at video sa social media ng makapal na usok na mula sa tuktok ng bulkan.

“Wala pong phreatic eruption, rock fall lang po yun. Ang nakitang makapal na usok ay mula sa rock fall o malalaking bato na dumausdos pababa. Habang nahuhulog ay nagpick-up ng mga abo. It was a massive rock fall kaya’t malaki din ang nakitang parang usok,” pahayag ni Alanis.

Dagdag niya, hindi rin maituturing na crater glow ang banaag na nakikita sa volcanic dome na nakunan ng mga litrato at videos.

“May nakikitang glow sa crater ng bulkan but scientifically and technically, it is not a crater glow. Posibleng ito ay lava na talagang nasa crater lamang at hindi mula sa magma na umaakyat pataas ng crater,” ani Alanis.

Muling paalala niya sa publiko tanging sa official sources lamang kumuha ng mga impormasyon. (PIA5/Albay)