KALIBO, Aklan (PIA) -- Ro banwa it Kalibo hay magapatigayon it Sarok Short Film Festival (SSFF). Raya hay paagi sa Tourism and Cultural Affairs Division (TCAD) it banwa ag Kalibo Council for Culture and the Arts (KCCA) agud mataw-an it igtaeupangud ro kutura it Aklan paagi sa turismo.

Sa anang pag-imbitar para sa meeting sa KCCA sa pagpresentar it proyekto, gintaw-an it importansya ni Kalibo Mayor Juris Sucro rayang bueuhaton nga sangka padayon nga pagtinguha it banwa agud ma preserbar ro kultura it komunidad.

Suno kay Romart Martesano, Working Committee Festival Director nga nagpresentar ku mga rason, mga sueundanon ag mga patakaran it SSFF, rayang aktibidad hay tuyo nga ipakita ro mga pag-abante it “Inakeanon Visual Storytelling.”

Tatlong mayor nga magadaog ro pagapilion, kon siin ro primerong pwesto nga mangin “Grand Gintong Sarok Awardee” hay magabaton it P50,000.00; ikaywa, P30,000.00; ag ikatlo, P20,000.00.

Samtang, may mga special awards man pareho ku Best in Film Editing, Best in Cinematography, Best in Production Design, Best in Musical Score, Best Actor & Best Actress for Performance in a Short Film, Audience Choice Award (online voting) ag Blockbuster Award (ticket-based voting) nga igatao. (AGP/VGV/PIA Aklan)