DAKBAYAN SA MARAWI, Lanao del Sur (PIA)--Makapahimulos na ang mga residente dinhi sa mas maayo ug mas episyente ang paghatod sa serbisyo sa pag-atiman sa panglawas sa pag-abli sa bag-ong modernong edipisyo ug pasilidad sa City Health Office (CHO).
Si City Mayor Majul Gandamra, CHO chief Dr. Ali Dalidig, Bangsamoro Health Minister Dr. Rizaldy Piang, Department of Health (DOH) Usec. Abdullah Dumama Jr., ug DOH-10 regional director Dr. Jose Llacuna Jr. nangulo, Hunyo 7, ang inagurasyon sa City Health Unit nga adunay modernong medical equipment ug teknolohiya nga maghatag ug primary ug secondary healthcare services.
Ang pasilidad adunay botika, laboratoryo, dental room, family planning ug prenatal room, sterilization room, ward/labor room, delivery room, consultation room, conference room, ug separado nga prayer room para sa lalaki ug babaye, ug uban pa.
Ang duha ka andana nga building nahimutang usab ang opisina sa CHO head.
Si Dalidig miingon nga ang city health unit building nagkantidad ug kapin sa P20 milyones ug gipondohan sa Asian Development Bank pinaagi sa Urban Climate Change Resilience Fund.
Matod niya nakadawat usab sila og disease surveillance vehicle, ambulansya, ug patient transport vehicle dugang sa mga ekipo gikan sa maong organisasyon.
Dugang pa niya, ang pagtukod kabahin sa programa nga Build Back Better Marawi. "One of the priorities of the city mayor is the restoration of health facilities and the delivery of basic social services to his constituents," ingon ni Dalidig.
(Usa sa mga prayoridad sa mayor sa siyudad mao ang pagpahiuli sa mga pasilidad sa panglawas ug ang paghatod sa mga batakang serbisyo sosyal sa iyang mga konstituwente)
Si Dalidig namasalig pud nga buhaton nila ang tanang paagi aron masiguro nga ang labing maayo nga sangputanan sa kahimsog matuman alang sa tibuuk nga mga konstituwente sa Marawi.
Anaa usab atol sa inagurasyon sina Integrated Provincial Health Office chief Dr. Alinader Minalang, Amai Pakpak Medical Center chief Dr. Shalimar Rakiin, Task Force Bangon Marawi manager Asec. Felix Castro Jr., ug mga opisyal sa MOH, DOH, ug sa kagamhanan sa dakbayan. (PIA Lanao del Sur)
