DAKBAYAN SA MARAWI, Lanao del Sur (PIA)--Ang kagamhanan sa dakbayan dinhi pinaagi sa City Health Office (CHO) padayong nag-upgrade sa mga pasilidad ug serbisyo niini aron mas mapakusgan pa ang paghatod sa dekalidad nga healthcare ngadto sa ilang katawhan.

"Six years ago, we were faced with the Marawi siege, which completely challenged the healthcare delivery system of the entire city. But we continue to work tirelessly in rendering medical services despite the adversities we faced, hoping one day we could restore every health facility in the city," matod sa CHO chief Dr. Ali Dalidig atol sa inagurasyon sa City Health Unit, Hunyo 7.

(Unom ka tuig ang milabay, nag-atubang kita sa Marawi siege nga hingpit nga naghagit sa healthcare delivery system sa tibuok siyudad. Apan nagpadayon kami sa pagtrabaho nga walay kakapoy sa paghatag og serbisyong medikal bisan pa sa mga kalisdanan nga among giatubang nga naglaum nga usa ka adlaw mapasig-uli ang matag pasilidad sa panglawas sa siyudad)

Si Dalidig nagkanayon nga unom ka tuig human sa pagkubkob, ang kagamhanan sa dakbayan uban sa suporta sa mga kaabag nakatukod ug upat ka Rural Health Units (RHUs) nga nahimutang sa barangay Papandayan, Kilala, Timbangalan, ug Cabingan.

Katloan ka barangay health stations usab ang natukod sa mga lugar nga dili kaayo apektado sa gyera samtang 24 ka barangay health centers ang gitukod sa labing apektadong lugar.

Ang temporaryo nga pasilidad sa pagtambal alang sa Covid-19 gitukod usab pinaagi sa joint venture sa Bangsamoro Ministry of Health ug sa kagamhanan sa siyudad aron masiguro ang kaandam sa dakbayan sa higayon nga adunay kalit nga pagsaka sa mga kaso.

Dugang pa, ang kadagkoan sa CHO nagkanayon nga aduna silay fully operational birthing clinic nga bukas 24/7 aron maatiman ang mga panginahanglan sa mga inahan nga hapit nang manganak. Kini nga serbisyo gipalig-on pa pinaagi sa pag-abli sa City Health Unit nga adunay family planning ug prenatal room, sterilization room, labor room, ug delivery room, ug uban pa.

Gibutyag usab ni Dalidig nga gisugdan na ang pagtukod sa Marawi City General Hospital sa barangay Tolali lakip na ang pagtukod og polyclinics nga pattern sa Cuban healthcare system.

"It is our vision to establish a health institution renowned for its excellence in healthcare through a responsive, accessible, equitable, and efficient healthcare delivery system equipped with modern facilities. That is why we always make it a point to upgrade to achieve excellence in health," ingon niya.

(Kini ang among panan-awon nga magtukod usa ka institusyon nga nabantog sa pagkamaayo sa pag-atiman sa kahimsog pinaagi sa usa ka responsive, accessible, patas ug episyente nga sistema sa paghatud sa pag-atiman sa panglawas nga adunay mga modernong pasilidad. Mao nga kanunay namong gihimo nga punto ang pag-upgrade aron makab-ot ang kahusayan sa kahimsog)
Dugang pa ni Dalidig kining tanan kabahin sa Build Back Better Marawi program sa kagamhanan sa dakbayan diin usa sa mga prayoridad mao ang pagpahiuli sa mga pasilidad sa panglawas ug ang paghatod sa mga batakang serbisyo sa katawhan sa Marawi. (PIA Lanao del Sur)