TAGBILARAN CITY, Bohol, May 30 (PIA) -- Halos napulo na sa matag napulo ka tawo ang mipadayag: wala na silay nakit-an nga mga armadong tawo o mga rebelde sa ilang mga tagsa-tagsa ka dapit dinhi sa Bohol.

Kini napalutaw didto sa Public Presentation sa Bohol Poll, Mayo 29, bisan pa man nga may nahitabo’ng pagsukliay sa mga bala sa mga rebelde ug alagad sa balaod niadtong naa pa sa tungatunga ang survey.

Gikataho ang encounter sa mga tropa sa kagamhanan ug nga rebelde nga gikamatay sa usa sa mga armado,didto sa bukirang mga lugar sa Tabu-an Antequera ug Abehilan San Isidro.

Ug agi og pagseguro nga wala gyud masayop sa gipagawas nga kasayuran, sa pangutana nga nabati pa ba nila ang presensya sa mga rebelde, 3% na lang ang mi-ingon nga ila pang nabati ang presensya sa mga armadong komunista dinhi.

Ang duha ka kasayuran, napagawas didto sa Public Presentation sa Bohol Poll, nga gihimo sa Holy Name University Center for Research and Publication kinsa nagpadagan sa pagkuha sa pulso sa katawhang Bol-anon sugod Abril 29 ngadto sa Mayo 21.

Sa public polling gamit ang scientific sampling diin mikuha lamang og 400 ka mga repondents aron makarepresentar sa 1.3 milyones ka Bol-anon, nabutyag nga 97% sa mga respondents sa survey sa tibuok Bohol ang namahayag nga wala na sila makakita pa og mga armadong tawo o mga rebelde sa ilang mga dapit.

Gani, sa kinatibuk-an nga Unang Distrito sa Bohol, diin may 200 ka mga respondents sa survey, 95% ang miuyon nga wala na sila makakita pag armadong mga tawo sa ilang mga lugar.

Kini gani, kay 97% usab sa mga respondents sa Tagbilaran ang midason nga wala na sila makakita pag armadong tawo, samtang sa 100 ka gatus pa nga mitubag sa pangutana nga taga District 1 apan dili taga Tagbilaran, 95% ang ming-ingon nga wala na sila makakita pag rebelde dinhi.

Sa ikaduha nga Distrito sa Bohol, sa 100 ka tawo nga gisuna sa susamang pangutana, 96% ang wala na makakita pag armado nga rebelde sa ilang lugar.

Sa ikatulo nga Distrito, tanan nga gipangutana miingon nga wala na sila makakita pag rebelde sa ilang lugar.

Sa laing pagtuis sa pangutana aron masuta kon nasabtan ba kini, gisaysay sa survey nga ang presensya ba sa armado nga mga tawo o mga rebelde sa ilang lugar, nabati pa ba nila, 3% lamang sa kinatibuk-ang respondents ang miingon nga ila pa gihapong nabati.

Labing daghan niini, gikan sa Unang Distrito, mga 4% sa mga respondents; ang 5% gikan sa mga kalungsuran gawas sa Tagbilaran, samtang 2% sa mga taga Tagbilaran ang nakabati pa sa presensya sa mga rebelde.

Sa pagsubay pa sa mga dagan sa panahon nga naghimo og survey, nakit-an usab nga niadtong Hunyo ug Hulyo sa tuig 2017, 97% usab sa mga taga Bohol ang miingon nga wala na sila makakita pag armadong mga tawo sa ilang lugar.

Sa pagka 2018, Hulyo ngadto sa Agosto, 99% sa mga respondents ang wala na makakitag armadong mga tawo o mga rebelde.

Sa Febrero ngadto sa Marso nga Bohol Poll sa 2019, 99% gihapon sa mga taga Bohol ang midason nga wala na sila makakita pag rebelde sa ilang mga lugar.

Sa Febrero ngadto sa Marso sa 2022, 97% pa gihapon sa mga Bol-anon ang wala na makahibalag pag armadong rebelde, ug sa Abril ngadto sa Mayo niining tuiga, 97% gihapon ang mibutyag nga wala na sila makakita pag armadong mga tawo o rebelde sa Bohol.

Ang survey, gipadagan sugod Abril 29 ngadto sa Mayo 21, ug may margin of error sa kinatibuk-ang Bohol, anaa sa +/-5% samtang ang Tagbilaran City, District 2 ug District 3 anaa sa +/-10.

Sa kinatibuk-ang District 1, ang margin of error, anaa sa +/-7%. (RAHC/PIA7 Bohol)