SYUDAD SANG ILOILO (PIA) -- Nagpanawagan si Presidente Ferdinand Marcos, Jr. sa mga ahensya sang gobyerno kag iban pa nga kabahin nga mga sektor nga mag-ugyon tuhoy sa ikauswag sang maritime industry sang pungsod.
Kabahin man diri ang pagkabig sang bag-o nga mga teknolohiya kag pag-sekyar sang mga kahigayonan para sa mga marinero.
Ginpabutyag ini sang Presidente bilang kabahin sang iya padayon nga pagpabaskog sang mga polisiya sa bahin sang maritime kag pag-amlig sang ikaayo sang mga marinero kag ila pamilya.
Sa iya nga mensahe sa ginhiwat nga Seafarer’s Summit sa Makati City, ginpatalupangod ni Presidente Marcos ang importansya sang paghugpong sa tunga sang pribado kag publiko nga sektor sa pagbag-o sang industriya sang transportasyon kaupod na diri ang shipping kun sa diin may mga ginapaabot nga bag-o kag sustenable nga langis kag pag-gamit sang digitalization kag automation.
Suno kay Marcos, agud mapatigayon ang pagbag-o, kinahanglan sang shipping industry nga magpasibu kag magbuylog sang mga bag-o nga mga developments sa ila nga mga barko. Ini magasugod man sa modernisasyon sang ila daan nga mga barko kag pagtuga sang bag-o kag mas moderno nga mga barko nga ginsangkapan sang mga bag-uhanon nga teknolohiya.
Nagasalig man ang presidente nga kun mag-ugyon ang tanan sa ini nga buluhaton, mangin masulhay kag mapabakod ang bwas-damlag sang mga marinero kag bug-os nga kumonidad
