TAGBILARAN CITY, Bohol, June 20 (PIA) -- Sugdan sa Department of Agriculture (DA) sa pagpanguna sa Agricultural Training Institute (ATI) Region 7 ang inutok nga pagpanghumayan pinaagi sa School on the Air (SOA) sa buwan sa Hulyo, taliwala sa hulga sa El Nino.  

Matud ni Doris Isabel Racho, information Officer sa ATI ug sa DA nga si Cheryl dela Victoria, ang SOA sa Smart Rice Agriculture (SRA) gitumong nga mogiya sa 2,500 ka mga mag-uuma sa Sentro nga Kabisay-an sa pagpananum sa humay sa inutok nga pamaagi ilabi na sa gikahadlokan nga pagkuwang sa tubig irigasyon dala sa posibleng epekto sa huwaw.

Programa nga gipundohan sa kagamhanan, ang SOA SRA gilauman nga makaabag aron may maani pa gihapon bisan sa possible nga pagrasyon sa patubig ug sa pagpili sa mga matang sa binhi nga itanom nga kadtong dili agsab sa tubig aron makaani pa gihapon.

Ang programa gipahiluna taliwala sa sitwasyon nga nasinati na ang pag-usab sa panahon, ang grabe nga pagsaka sa temperature nga nagpa-init sa kalibutan ug nakaapekto sa panahon, sa pagtaas sa taub  ug sa pagkahulma sa mga bagyo nga may hilabihan nga kakusog.

Ang epekto niining nga kausaban sa mga pananum, nagkagrabe usab, hinungdan nga gipahiluna sa kagamhanan ang inutok nga pagpananum ilabi na sa humay aron matubag pa gihapon ang panginahanglan sa pagkaon sa kalibutan.

Pagsagop sa Climate Smart Agriculture (CSA), dayag pa ni dela Victoria, didto sa pasiunang tigum aron pagcoordinate sa mga lakang sa pagkurambusay sa mga ahensya aron mas mahimong epektibo ang programa sa radio nga maoy silbi nga tunghaan sa kapid-an ka nga mag-uuma sa humay sa Kabisay-an.

Ang CSA naglangkob sa Weather Smart pinaagi sa pagsubay sa labing bag-ong tambag sa kahimtang sa panahon isip giya sa pagpananum, Water Smart u gang kontrolado na paggamit sa patubig, pagsawod sa tubig uwan, Carbon Smart o pagseguro pagkunhod sa carbon emissions, Energy Smart o ang paggamit sa limpyo nga tinubdan sa enerhiya sa panguma, Nutrient ug Pest Smart gamit ang integrated natural Pest management technologies ug Knowledge Smart isip giya sa mas lapad nga networking alang sa dugang kahibaw sa maayong bansay ug teknolohiya sa panghumayan.

Ang SOA sa SRA, enrollan sa 2500 ka mga mag-uuma sa Central Visayas, kinsa, sa tubouk nga oras matag semana, maminaw ug magtutok sa usa  ka estasyonan sa radio aron didto mamati ug magkuha sa  mga pagpasabut kabahin sa pagpanguma.

Usa ka distance learning program alang sa mga lalawigan nga may dagkong humayan, ug dungan nga isibya sa mga paboritong estasyonan sa radio, ang unod giandam sa DA-ATI, PhilRIce ug mahimong ipadayon pa sa sunod nga mga katuigan kon mapruwebahan nga epektibo. (RAHC/PIA-7 Bohol)