ILOILO CITY (PIA6) -- Liwat nga ginkilala sang Philippine Women Commission (PCW) ang probinsya sang Iloilo bilang isa ka Gender and Development Local Learning Hub (GAD LLH) para sa tuig 2023-2026 bangud sa pagduso sini sang 'women's economic empowerment' paagi sa pag-upod sang nanuhaytuhay nga partners.

Ginpangunahan ni PCW OIC-Deputy Director for Management Services Honey M. Castro kag Iloilo Provincial Administrator Raul Banias ang pagpakita sang markers sadtong Hunyo 29, 2023 sa Casa Real de Iloilo.

Nag-upod man sa nasambit nga selebrasyon sanday Board Member Carol-V S. Espinosa-Diaz, vice chairperson sang Sangguniang Panlalawigan Committee on Women and Family Affairs; Local Economic Development and Investment Promotions (LEDIP) Center head Aulynn Yue Sin; kag iban pa nga myembro sang GAD Iloilo Technical Working Group.

Gintumod ni Castro nga ang recertification sang Iloilo naga-simbolo sang isa ka milestone para sa provincial government padulong sa pag-reyalisar sang ‘gender equality and women empowerment’ sa bilog nga probinsya.

Kung matandaan, ang probinsya sang Iloilo isa man sa nagapanguna nga lima ka local government units (LGUs) sa pungsod nga nakakuha sang GAD LLH certification gikan sa PCW sang 2015-2018. Gintumod man ini sa ila programa sa Results Based Monitoring Evaluation (RBME) Framework and System – isa ka stratehiya sa gender mainstreaming nga nagaplano sang 'short to long term' GAD targets sang probinsya. (AAL/JNH/PIA 6 Iloilo)