LUNGSOD NG CALAPAN, Oriental Mindoro (PIA) -- Aambag sa paglikha ng mga proyekto at programang pangkaunlaran sa rehiyon ng Mimaropa ayon sa resulta ng isinagawang noong 2022 National Demographic and Health Survey (NDHS) Regional Data Dissemination Forum Mimaropa Region sa Mahalta Resorts and Convention Center, sa lungsod noong Hulyo 10.

Pinangunahan ng Philippine Statistics Authority (PSA) ang naturang gawain katuwang ang United States Agency International Development (USAID) sa pagbabahagi ng datos hinggil sa estado ng kalusugan sa rehiyon.

Ilan sa mga tinalakay sa gawain ang fertility and family planning na binubuo ng maternal health at childhood mortality; HIV knowledge and testing, health care utilization; at mga programang pangkababaihan.

Inaasahan na sa pamamagitan ng mga datos na ibabahagi, makakalikha ang mga sangay ng gobyerno ng mga programa at polisiya na naaangkop sa pangangailangan ng bawat sektor na nabanggit.

Inilahad naman ng Commission on Population and Development (CPD) Mimaropa ang tatlong layunin na nais makamit ng ahensiya bilang suporta sa gawain. Una ay ang matatag na ugnayan ng mga pamilya at komunidad; pangalawa ay maginhawang pamumuhay ng bawat pamilya; at pangatlo ay ang seguridad sa kinabukasan ng bawat pamilya, lalung-lalo na ang mga kabataan.

Lahat ng mga ito ay nakaangkla sa Ambisyon Natin 2040 - isang pangmatagalan na plano ng pamahalaan sa pamamagitan ng pagtutuwang sa paglikha ng mga programa at proyekto para sa bawat mamamayang Pilipino sa susunod na 25 taon.

Pasasalamat naman ang ipinaabot ng PSA sa lahat ng dumalo sa naturang gawain at umaasa sila na ang kanilang pinagsikapan ay magagamit ng mga ahensiya sa paggawa ng mga programang makapakikinabangan ng mga mamamayan. (JJGS/PIA Mimaropa-Oriental Mindoro)