SYUDAD SANG ILOILO (PIA) -- Ginmanduan ni Presidente Ferdinand Marcos Jr. ang Department of Migrant workers (DMW) kaupod ang iban nga mga ahensya sang gobyerno nga magpangita sang pamaagi nga mangin libre ang pagproseso sang aplikasyon para sa Overseas Employment Certifications (OEC).

Direktiba ini sang presidente sa ginhiwat nga miting nga gintambongan sang DMW, Bureau of Immigration (BI), kag Department of Information and Communications Technology (DICT sa Malacañang kun sa diin ang DMW nagtanyag sang DMW Mobile App.

Suno naman kay DMW Secretary Maria Susana ‘Toots’ Ople, ginahulat lamang nila nga paga-aprobahan sang DICT antes ang opisyal nga paglansar sang DMW App agud masiguro ang cybersecurity features sini.

Nagpangabay man si Ople sa publiko sang pasensya samtang gina-obrahan sang pamaagi agud mahatagan sang solusyon ang isyu batok sa OEC application gamit ang teknolohiya.  

Nalakip sa DMW App amo ang OFW Pass nga ginakabig nga digital kag secure nga bersyon sang OEC, kun sa diin ini ang magaserbe man nga digital identity sang mga OFWs.

Matapos ang duwa tubtub tatlo ka bulan nga transition period sa pag-activate, ang OFW Pass maging kabaylo na sang OEC.

May dako nga kinalain ang OFW Pass sa OEC. Ang OFW Pass, halimbawa, QR-code generated ini kag makuha lamang pinaagi sa pag-gamit sang App samtang ang OEC kinahanglan nga maga-proseso onsite kag may balayran nga P100.00.

Mangin valid naman ang OFW Pass tubtub sa expiration sang kontrata sang OFW samtang ang OEC naman maga-expire matapos ang 60 ka adlaw.  

Nalakip sa mga maka-avail sang OFW Pass amo ang mga first-time OFWs, Balik Manggagawa OFWs, mga OFWs nga nagbalhin sa lain nga empleyado ukon kutob sa mga kontrata nga kinahanglan pa nga ipa-rehistro kag pamatud-an sang Office of the Labor Attaché.

Agud mapalapnag ang App, nagpatukod ang DMW sang OFW Pass Teacher nga isa ka volunteer system kun sa diin ang mga narehistro nga mga OFWs mahatagan sang nagakaigo nga materyal nga tudluan ang iban nga mga OFWs sa pagamit sang App.

Pagatestingan naman sang DICT ang cybersecurity features sang App kag i-report ang resulta sini sa DMW.

Ginapaabot man sa ahensya nga igapa-angot ang mobile app sa e-travel kag e-Gate systems sang BI kag paga-angot man ini sa eGov PH Super App sang DICT.

Kabahin ang Google Play kag Apple App Store nga gin-aprobahan para ma-downloadan sang mobile application para sa mga OFWs. (AAL/LMLE/PIA Iloilo/PND)