SAN JOSE, Antique -- Nagsapol kang nagligad gid lamang ang Municipal Council on Disability Affairs (MCDA) kang dya nga banwa para istoryahan ang mga binuhatan kag kadarag-an kang konseho, pati man ang mga plano sa paraabuton nga National Disability Prevention and Rehabilitation (NDPR) Week kadya nga bulan kang Hulyo.

Ginpresentar kang mga miyembro nga opisina kag ahensya kang MCDA ang anda mga binuhatan kag kadarag-an sa pagpalapnag kag pagprotekta kang kinamatarong kang mga Persons with Disability (PWD) ukon mga taho nga may kasablagan sa lawas.

12 ka mga PWD, kag panagtag sa kapin 325 ka mga PWD kang cash relief assistance halin kay Senator Christopher “Bong” Go.

Hambal ni MCDA Chairman kag San Jose de Buenavista Mayor Elmer Untaran, suportado kang ana nga administrasyon paagi sa municipal PDAO ang mga inisyatibo kang konseho sa pagbuhat kang sangka sosyodad nga naga-atipan sa sektor kang mga PWD.

Sa banwa kang San Jose de Buenavista, pira sa mga aktibidad nga ginaduso sa pagselebrar kang NDPR Week halin Hulyo 17-23 amo ang “convergence of services,” coastal clean-up, kag pagtiriripon kag pagkilala kang mga darayawon nga PWD kag partners.

Sa pinaka-urihi nga datos, hambal kang PDAO Antique focal person kag social worker nga si Careen Panaguiton halin sa Provincial Social Welfare and Development Office (PSWDO), may 1,472 ka registered PWD sa banwa kang San Jose de Buenavista, samtang masobra 12,500 sa bilog nga probinsya. (AGP/BPS/PIA Antique)