SYUDAD SANG ILOILO (PIA) -- Nangin madinalag-on ang Dinagyang Festival sang syudad sang Iloilo sa ginhiwat nga Aliwan Fiesta Street Dance Competition sining karon lang Manila.

Ini ang makapito na nga beses nga kadalag-an sang Dinagyang sa nasambit nga paindis indis.

Nalakip sa tiglawas sang Dinagyang Festival ang Tribu Parianon sang distrito sang Molo nga ginkilala nga kampyeon sang ginpatigayon nga Dagyang Sa Barangay nga paindis indis nga nasakop sang 55th Dinagyang Festival sang Enero sini nga tuig.

Kaupod man sa Dinagyang Festival amo ang nagkalain lain nga mga grupo sang trisikad kag tricycle riders, kag mga trabahante sang construction kag Iloilo Fish Port.

Sa pihak nga bahin, nakakuha sang ikaduwa nga pwesto ang Sinulog Festival (Cebu), ikatatlo ang Manggahan Festival (Guimaras), ikaapat ang Halamanan Festival (Guiginto, Bulacan), kag ikalima ang Kadalag-an Festival (Victorias City, Negros Occidental).

Ginakabig ang Aliwan Festival bilang “Mother of all Filipino Festivals” bangud sa pagtingub sang ini nga kahiwatan sang mga nagkalain lain nga mga kapistahan kag selebrasyon  sang mga kaprobinsyahanan sa paindis indis kaangay sang streetdance kag float parade.  (AAL/LMLE/PIA Iloilo)