Isa sa sining mga proyekto ang P170-bilyon nga Solicited Proposal to Rehabilitate, Operate, Expand, and Transfer ang Ninoy Aquino International Airport PPP Project nga patigayunon pinaagi sa public-private partnership (PPP).
“This initiative seeks to address long-standing issues at NAIA, including inadequate capacity and restricted aircraft movement,” pahayag ni Balisacan.
Tinutuyo sang proyekto nga madugangan ang tuigan nga airport capacity humalin sa 35 milyon tubtub bisan 62 milyon ka mga pasahero, mapasanyog ang air traffic movement kag mapaayo ang kabilugan nga eksperyensya kag kalidad sang serbisyo.
Nagalakip man ini sang pagpaayo sang tanan nga passenger terminal sa NAIA kag ang tanan sini nga pasilidad, kalakip yadtong sang una nakatuga sang pagkaawat, pagklaro ni Balisacan.
Ginapaabot nga magasugod ang proyekto sa 2024.
Ang ikaduha nga gin-aprobahan nga proyekto, ang Samar Pacific Coastal Road II Project nga may badyet nga PHP 7.48 bilyon. Ini nagalakip sang konstruksyon sang duha ka taytay nga ginatawag Laoang II Bridge kag Calomotan Bridge, subong man pagpaayo sang karon nga mga dalan sa tunga sang Laoang Island kag mainland Samar Island.
Ining 15-kilometros nga imprastruktura pangkasanyugan ginapaabot nga magapaayo sang connectivity sa rehiyon kag magapalapnag sang ekonomiya nga pagsanyog.
Gin-aprobahan man ang Unsolicited Proposal para sa Upgrade, Expansion, Operation, kag Maintenance sang Laguindingan International Airport Project.
May ginabulubanta nga balor nga P12.75 bilyon, ang ini nga inisyatibo nakatuon sa paglakip sang tayuyon kag digitally advanced features sa desinyo kag operasyon sang Laguindingan International Airport sa Misamis Oriental.
Ang proyekto, nga sa idalum sang PPP, nagatuyo sa pagpasanyog sang rehiyunal nga kauswagan, pagpalapnag sang turismo kag paghatag sang mas maayo nga eksperyensya panglakaton para sa mga pasahero.
Dugang sa sining bag-o nga mga proyekto, gin-aprobahan man sang NEDA Board ang pagbag-o sa sakop, balor desinyo kag/ukon loan validity para sa apat ka nagapadayon nga proyekto pang-imprastruktura.
Ginalakipan ini sang Integrated Disaster Risk Reduction and Climate Change Adaptation ukon IDRR-CCA Measures sa mga low-lying nga mga lugar sang Pampanga Bay Project; ang Jalaur River Multipurpose Project Stage II project; ang Malitubog-Maridagao Irrigation Project Stage II or MMIP II; kag ang Cebu Bus Rapid Transit Project.
Ginkumpirmar ni Balisacan nga ang Proposed Adoption sang National Policy on Infrastructure Sector Master Plans nagatuyo sa pagsantu kag pagrationalize sang pagbalay sang master plans para sa sector sang imprastruktura.
Ini nga polisa magapat-ud sang koordinasyon, synergy kag responsiveness sang sektor sa naga-usbong nga mga isyu.
Suno kay Balisacan may executive order nga igapaguwa agud mapabaskog ang implementasyon sang sining polisa sa bilog nga pungsod. (AAL/LAF/PIA6-Iloilo/PND)
