LUNGSOD QUEZON, (PIA) --All set na ang paghahanda ng MMDA sa ikalawang State of the Nation Address (SONA) ni Pangulong Ferdinand R. Marcos Jr. ngayon Lunes.

Kasama sina MMDA General Manager Usec. Procopio Lipana, Assistant General Manager for Operations Asec. David Angelo Vargas, at Traffic Operations Officer Manny Miro sa pagsasagawa ng walk thru at inspeksyon sa Commonwealth Avenue na pinangunahan ng Philippine National Police at iba pang opisyal ng pamahalaan ngayong araw.

Nagsagawa rin ang Road Emergency Group ng briefing sa mga idedeploy sa SONA. Inihanda naman ng Flood Control and Sewerage Management Office ang kanilang flood mitigation equipment.

Aabot sa 1,354 kawani ang tutulong sa pagsasaayos ng trapiko, emergency response, crowd control, at traffic monitoring. Gayundin ang pagmonitor sa transport strike.

May dispatching din ng ambulance, tow trucks, mobile patrol units, at motorcycle units.

Inaabisuhan ang mga motorista na iwasan ang Commonwealth Avenue at gamitin ang mga alternatibong kalsada. (mmda/pia-ncr)