MALAYBALAY CITY (PIA)--Ang mga ‘Rescuers’ gikan sa mga lokal nga ‘disaster station’ sa 20 ka mga lungsod ug duha ka dakbayan sa Bukidnon mipakita sa ilang kahanas atol sa usa ka semana nga pagpahigayon sa 4th Rescue Olympics nga gi-organisa sa provincial government pinaagi sa Provincial Disaster Risk Reduction and Management Office (PDRRMO).
Si Bukidnon Governor Rogelio Neil P. Roque maoy nangulo sa pagbukas sa 4th Provincial Olympics niadtong Hulyo 17, nga gisugdan pinaagi sa motorcade sulod sa dakbayan sa Malaybalay uban sa pakigtambayayong sa nagkalain-laing stakeholders.
"Strong men and women from the various DRRs in the province welcome to the Rescue Olympics, wherein the games you play, will help save lives someday," matud ni Roque.
Ang National Disaster Resilient Month (NDRM) ginasaulog sa tibuok nasud matag bulan sa Hulyo.
Sa tema nga "BIDAng Pilipino: Building a Stronger Filipino Well-being towards Disaster Resilience," tuyo sa NDRM nga masabtan sa publiko ang risgo sa disaster, mahimong preperado ang mga responders panahon sa kalamidad nga mo-abot, bisan ‘natural’ o ba kaha ‘man-made disasters.’
Ang mga partisipante gikan sa Local Disaster Stations sa 20 ka lungsod ug duha ka siyudad mi-agi sa mga nagkalain-laing aktibidad sama sa “Fire Mixed Combat Challenge; Mountain Search and Rescue, Vehicular Accident simulations, and Swift Water and High Angle Challenge.”
Ang grand champion makadawat og P100,000, samtang ang mga minor awardees makadawat og P50,000 matud ni Anecito Torayno Jr., ang Operations and Warning Section chief sa PDRRMO. Apan gipasabot niya nga ang mga hurado mo-release sa mga resulta sa Olympics kung mahuman na sa hurado pag-kwenta ug pag-consolidate sa mga puntos ug ratings sa tanang mga nag-participate nga mga team.
Tungod sa mga rescue team gikan sa mga nagkalain-laing dapit nga nagsanib alang sa kalihokan, sumala ni Torayno nga napakusgan sa mga Rescuer ang pagpabiling lig-on kung dunay kalamidad ug pagtukod og mas luwas nga kaugmaon alang sa tanan. (BGE/PIA-10/Bukidnon)
