SAN JOSE, Antique (PIA) -- Padayon sa pagpang-agda ang Provincial Disaster Risk Reduction and Management Office (PDRRMO) sa publiko nga magpanghanda sa bisan ano nga kalamidad ukon emerhensya.

Sa sangka interview, ginhambal ni Local DRRM Officer III Michael Tolentino halin sa PDRRMO nga bahul ang bentaha kung preparado kag may kinaaram sa mga kalamidad kay ang preparasyon kag ihibalo nagapanaba kang risgo.

Dugang pa ni Tolentino, kinahanglan nga ang tagsa ka miyembro kang pamilya may “GO BAG” nga pwede gilayon mabitbit sa ti-on nga kinahanglan mag-evacuate.

Ang GO BAG dapat may sulod nga “survival items” pareho kang radyo nga may extra nga baterya, irimnon nga tubig, importante nga mga dokyumento, ready-to-eat nga mga pagkaon, selpon kag charger nga may power bank, first aid kit kag mga bulong, bayo, flashlight, kag pito.

Sa pagselebrar kang National Disaster Resilience Month (NDRM) kada bulan kang Hulyo, mas ginapasanyog kang PDRRMO ang mga lihuk sa pagpaintindi sa publiko kang importansya kang disaster risk reduction and management.

Kadya nga tuig, tuyo kang NDRM nga tugruan igtalupangod ang kaayuhan kang mga Pilipino para sanda makabulig sa pagtukod kang sangka “disaster-resilient” nga pungsod. (AGP/BPS/PIA Antique/Photo courtesy of MDRRMO Tibiao)