TAGBILARAN CITY, Bohol, July 20 (PIA) –- Magkuha si Gobernador Erico Aristotle Aumentado og duha ka full-time product developers aron makatabang sa Bohol ug sa creative industries niini nga makahimo pa og mas nindot nga mga produktong mugnang Bol-anon.
Kini maoy gibutyag ni Provincial Administrator Aster Caberte, didto sa pagbukas sa 2023 Sandugo Trade Expo, ang tinuig nga kanhi Bohol Products Showcase nga nahimo na nga regional ug karon, usa na ka national crafts fair.
Ang kahinam ni Gob Aumentado sa pagpanindot pa sa mga produkto, taliwala sa pagpadeklara sa Bohol isip usa na sa 159 nga mga napili sa United Nations Educational Scientific Cultural Organization (UNESCO) geoparks sa tibuok kalibutan.
Ang pagkapili sa Bohol, naglakip na usab sa pagtimbang sa mga sistema ug mga pamaagi nga gipatuman sa lalawigan nga makapatunhay sa mga talagsaon nga mga panan-awon, butang ug mga kinaiya sa mga Bol-anon.
Ang Sandugo Trade Expo nga gitanyag na usab isip lugar sa mga local craftsmen sa pagpasundayag sa ilang mga produkto nga giiliw ilabi na sa industriya sa turismo, nahimo na usab nga gipangita nga trade fairs, tungod sa nagkadaiyang produkto nga una pang ikapakita sa merkado nga itanyag dinhi.
Giila na usab ang mga Bol-anon nga bantugan sa arte ug sa pino nga trabaho nga nagsibot pa gihapon sa karaang abilidad ug mga pamaagi nga maoy nakapahimo niini nga dili dali sundogon.
Apan, sa pagdagsang na usab sa mga produkto nga gikan sa mas durable nga sanggkap sama sa plastic rattan puli sa snibit nga uway, lais sa kawayan, ug mga plastic nga kagamitan, kinahanglan lamang usab sa Bohol nga mangita og pamaagi nga moanindut pa ang design, aron makaambas sa mga produkto nga gi mass produce sa mga makina ug migamit sa synthetic nga mga sangkap.
Aron dili mawani ang mga Bol-anon sa mga bag-ong desinyo ug mga pauso, makatabang ang duha ka mga designers nga magapahimong mas pilion ang ginama sa Bohol, kon itandi sa ginama sa uban.
Kining mga designers nga sweldohan unya sa Bohol, maoy ipadala ngadto sa mga manibitay, manghimo-ay og mga kagamitan ug mga tigproseso sa mga pagkaon aron maoy magsugyot sa mga gikinahanglan nga kausaban aron mahimong mas himalitan pa ang mugnang Bol-anon. (RAHC/PIA-7 Bohol)
