TAGBILARAN CITY, Bohol, July 30 (PIA) -- Ang Tribu Tagbilaranon sa dakbayan sa Tagbilaran ang nahimong kampeon sa Sandugo street dancing ug ritual showdown karong tuiga nga gipahigayon niadtong Domingo, Hulyo 30.
Isip kampeon, nakadawat sila og P500,000 nga ganting salapi.
Gawas niini, nasakmit usab sa Tribu Tagbilaranon ang Best in Costume, Best in Street Dancing ug Best in Musicality.
Sa laing bahin, ang Banay Loaynon sa Munisipalidad sa Loay ang gideklarar nga second placer diin nakadawat sila og P300,000 nga ganting salapi.
Samtang ang 3rd placer nga Tribu Carmenanon sa Munisipalidad sa Carmen nakadawat og P150,000 nga ganting salapi.
Adunay kinatibuk-an nga 10 ka mga contingents ang misalmot sa pagbalik sa Sandugo street dancing competition human kini nahunong sulod sa tulo ka tuig tungod sa coronavirus pandemic.
Ang ubang mga contingents mao ang Tribu Pilarnon sa Munisipalidad sa Pilar, Tribu Islahanong Talibongnon sa Munisipalidad sa Talibon, Tribu Guindulmanon sa Munisipalidad sa Guindulman, Tribu Ambacon sa Munisipalidad sa Getafe, Tribu Calapenhon sa Munisipalidad sa Calape, Tribu Pangpanganon sa Munisipalidad sa Buenavista ug Tribu Anyag sa Munisipalidad sa Tubigon.
Ang Sandugo Festival usa ka tinuig nga makasaysayanong selebrasyon nga mahitabo matag tuig sa lalawigan sa Bohol.
Kini nga pista naghandom sa Tratado sa Panaghigalaay tali ni Datu Sikatuna, usa ka lider sa Bohol, ug Espanyol nga conquistador nga si Miguel López de Legazpi. (ECB/PIA7-Bohol)
