TAGBILARAN CITY, Bohol, July 25 (PIA) -- Kanhi ka ba nga regular nga sakop sa kalihukan ug niundang na dihang mingkagiw ang imong mga kauban ngadto sa mga silingan nga isla dihang wala na silay mahimo pa dinhi?
May mga nakahibaw bas a inyong lugar nga didto ka kanhi ming-abin sa Communist Party of the Philippines (CPP) ug sa ilang armadong kusog nga nailhang New People’s Army (NPA) sa National Democratic Front (NDF)?
O ilado ka sa kalihukan kaniadto apan wala ka na maglihok karon samtang nanginabuhi sa matarong?
Kon mao kana, unsa may imong kasegurohan nga wala ka isumbong sa mga kauban kanhi nga nadakpan, o sa imong mga silingan nga nahadlok na nga balikon ka sa mga kanhi kauban aron aghaton ka og balik sa kalihukan?
Kini lakip sa mga balido nga pangutana nga gitubag ni Captain Jayrod Cabahug, Commander sa Task Group Bohol ug pangulo sa mga kasundalohan nga nahibilin pa sa Bohol aron sa pagseguro sa pagtunhay sa kahapsay ug kalinaw dinhi.
Gitaho ni Capt Cabahug nga ang nahitabo nga encounter niadtong milabay nga Sabado Hulyo 8 didto sa kalasangan nga bahin sa Dagohoy Danao, kini nag pakita nga ang mga armado nga nahibilin nga sakop sa mga rebelde, adto gayud dangop sa mga kanhi sakop nga nanginabuhi na nga malinawon.
Kon kini mahitabo ug maatlan nga mag-abut ang mga sakop sa kagamhanan nga naghimo og peace and security operations, hayan maamong ug maglisud na hinuon og pasabut sa katawhan nga wala ka na sa kalihukan.
Nunot niini, tambag sa mga tinugyanan, tahan ngadto sa inyong mga opisyal sa barangay o lungsod, aron mahimong mapapas na ang ngalan sa order of battle nga gihuptan sa mga kasundalohan.
Sa pag surrender, itandi ang pangalan sa mga nakalista sa order of battle, ug kon wala ang pangalan didto, mas makatulog ka na nga malinawon nga wala ka mahi-apil.
Kon ugaling anaa ka sa listahan, may posibilidad pa nga makapailawom ka sa Enhanced Comprehensive Local Integration Program (ECLIP).
Ang E-CLIP us aka programa nga buot motabang sa mga kanhi sakop sa CPP-NPA-NDF lakip na ang Militia ng Bayan o masa nga buot na nga mobalik ngadto sa kagamhanan, ug sa katinlingban aron malinawon na nga ikauban ang pamilya.
Segun sa Administrative Order No. 10 nga gipirmahan ni kanhi pangulo Rodrigo Duterte niadtong Abril 3, 2018, ug sa sa Implementing Rules and Regulations sa nasampit nga mandu ehekutibo, ang ECLIP gitagana alang niadtong mga mingsurender ngadto sa mga tinugyanan sa baload sugod Abril 3, 2018 hangtud karon sama sa mga regular nga armadong sakop sa kalihukan, ang ilang mga bana o asawa, anak, gikapuyo o anak sa gawas, ilang mga ginikanan ug igsoon, ug mga sakop sa masa.
Pinaagi sa E-CLIP, sila nga mingtahan na sa balaod, mahatagan sa mga nagkadaiyang tabang, mga kasayuran nga makatabang sa ilang pagsugod og bag-ong kinabuhi, mga pagbansay ug pagkat-on og bag-ong abilidad aron makapangitag laing panginabuhian.
Gani, matud ni Capt Cabahug, dili lamang sila ang matabangan, mahimo usab ang komunidad nga ilang gipuy-an.
Sa higayon nga makapahibaw ang kanhi sakop sa mga rebelde o masa nga motahan na, kadtong opisyal o unit nga gisurrenderan mopahibaw sa mingtahan sa proseso ug iduso niya ang mingsurender ngadto sa local social welfare and development Office (LSWDO), kina maoy magvalidate sa pangalan sa kanhi sakop kon kini nahi-apil bas a listahan sa mga pwede makadawat sa hinabang o nahi-apil na sa nahaunang gihatagan.
Ang LSWDO mao nay moendorso sa mingsurrender ngadto sa usa ka balay diin siya ipailawom sa mga proseso sa pagdawat pagbalik sa katilingban.
Seguradohon usab sa E-CLIP Committee nga mahatagan kini og tukma nga secuirity arrangements ug suplay sa nag-unang panginahanglanon samtang anaa sa kamot sa mga tinugyanan.
Kon may dala nga armas pagsurrender, kini nga armas itugyan sa kapolisan alang sa pagproseso ug pag-ila sa katumbas nga kwarta sa armas nga natahan.
Dinhi, ang Joint Army, Police ug Intelligence Committee magtumbok kon ang mingsurrender lakip pa ba sa order of battle aron mapapas na sa listahan, ug mahimong makapadayon na sa pagpuyo nga malinawon. (RAHC/PIA-7 Bohol)
