SAN JOSE, Antique (PIA) -- Kinahanglan ang kolaborasyon kang tanan nga miyembro kang sosyodad sa pagsiguro kang bastante kag puno kang nutrisyon nga pagkaon para sa mga Pilipino.

Dya ginhambal kang sangka Nutritionist-Dietician nga si Jocelyn Morano halin sa Antique Provincial Health Office (APHO) sa sangka radio program kang nagligad gid lamang.

Para kay Morano, ang mayad nga nutrisyon kang mga Pilipino malambot kung may sampat nga suplay kang produkto agrikultural, barato nga presyo kang baraklon, may parangabuhian ang pamilya, kag may malapad kag tayuyon nga programa sa nutrisyon ang gobyerno.

Ana man gintugruan importansya ang aktibo nga partisipasyon kag kolaborasyon sa tunga kang mga nanari-sari nga opisina kag ahensya kang gobyerno, non-government organizations (NGOs), civil society organizations (CSOs), kag pribado nga sektor.

Ang Pinggang Pinoy kinahanglan nga may sulod nga kapin 17 porsyento ka prutas, 33 porsyento ka laswa, 33 porsyento kang carbohydrates, kag 17 porsyento ka protina.

Apisar nga may regular nga feeding programs nga ginahiwat ang gobyerno sa mga pre-school, nagpahanumdom si Morano sa mga ginikanan nga pamahawan gid ang mga kabataan bag-o pasudlon sa eskwelahan kag siguraduhon nga sanda makakaon indi magnubo sa tatlo ka beses sa isa ka adlaw.

Gin-agda na man ang publiko nga magtanom sa anda mga panimalay kang mga prutas kag laswa para makalibre kang mga pagkaon nga masustansya kag maglikaw sa mga fast food kag mga pagkaon nga tama ka tam-is, maarat, kag mamantika. (AGP/BPS/PIA Antique)