SYUDAD SANG ROXAS, Capiz (PIA) -- Magasugod na sa Agosto 28, 2023 tubtob Nobyembre 29, 2023 ang “gun ban” kaangot sa election period para sa Barangay kag Sangguniang Kabataan Elections (BSKE).

Ginpahayag ni Atty. Dennis Ausan nga Regional Election Director sang Commission on Elections (COMELEC) Regional Office 6 nga suspendido ang "effectivity" sang mga narehistro nga mga armas luthang kalakip na ang Permit To Carry Outside Residence magluwas lang kon may nakuha nga exception ang natungdan sa COMELEC.

Pagapangunahan man sang COMELEC ang pagtipon sang Regional Joint Security Control Center (RJSCC) sa Agosto 22 agud matalakay ang mga pagpanghanda sa seguridad kag iban pa nga plano kaangot sa eleksyon.

Liwat naman nga magasapol ang RJSCC matapos ang pag-file sang Certificate of Candidacy (COC) sang mga magapadalagan para sa mga posisyon sa barangay kag SK bangud sa amo nga ti-on nahibaluan na kon sin-o ang mga nagapadalagan kag nagakontrahanay sa pinilian.

Ang campaign period para sa BSKE ang gintalana sa Oktubre 19 tubtob Oktubre 28 kag ang adlaw sang pinilian ang gintalana sa Oktubre 30. (AGP/AAL/PIA Capiz)