DIPOLOG CITY, Aug. 28 (PIA) - Ang Provincial Health Office (PHO) – Zamboanga del Norte, uban sa Department of Health (DOH), mipresentar sa ilang mga plano ug inisyatiba subay sa Family Planning Month, Breastfeeding Month, ug National Hospital Week sa gihimong Media Forum sa Mibang Hotel, ning siyudad sa Dipolog.
Ang kalihokan naghisgot sa mga mahinungdanong giya bahin sa pagplano sa pamilya sama sa responsible parenting, birth spacing, respeto sa kinabuhi, ug informed choice volunteerism. Kining upat ka mga giya sa Family Planning, gipasabot sa PHO nga ang tanan nagpaminos sa peligrosong aborsyon ug maternal mortality rates.
Gipahayag usab sa PHO ang tumong niini nga paubsan ang stigma nga naglibot sa mga kontraseptibo ug sikswal nga edukasyon, kung dili man hingpit nga mapugngan, ang mga peligrosong konsekwensiya sa pagmabdos sa mga kabatan-onan.
Si Ms. Elena Daarol, family planning coordinator sa PHO, mipahibalo usab nga ang publiko makaangkon ug libreng vasectomies ug bilateral tubal ligation (BTL) isip permanenteng mga opsyon sa kontraseptibo pinaagi sa ilang buhatan. Bisan pa, gipasiugda usab niya nga kini nga kapilian magamit ra alang sa mga inahan nga adunay upat o daghan pa nga mga anak.
Ang mga libreng pills, condom, ug uban pang gamit pang kontraseptibo anaa usab sa mga local rural health units subay sa 'Healthcare For All' nga programa ni Presidente Ferdinand “Bongbong” Marcos.
Atol sa maong kalihukan, gituki usab ang Republic Act 7600 o ang Rooming-in ug Breast-feeding Act uban sa mga benepisyo sa gatas sa inahan kon itandi sa pormula sa bottle feeding. Gitinguha usab sa PHO nga mawagtang ang sayop nga pagsabot sa bottle feeding nga mas maayong alternatibo, nga gipasabot nga ang gatas sa inahan naglangkob sa tanang panginahanglan sa bata sulod sa unang siyam ka bulan ug adunay mas daghang nutrisyon kon itandi sa pormula.
Si Ms. Rosita Gonzales, nutritionist ug dietician sa PHO-ZN, nibutyag nga adunay breastfeeding support group subay sa ilang breastfeeding advocacy.
Gideklarar niadtong Agusto 1, 1994 ang National Family Planning Day pinaagi sa Proclamation No. 429 ug ang tibuok buwan sa tuig 2009 gideklarar nga National Breastfeeding Month pinaagi sa Republic Act 10028 sa tumong nga mapataas ang kahibalo sa publiko kalabot sa importansya sa pagpasuso. (EDT/IRA-GIP/PIA9-Zamboanga del Norte)
