BAGUIO CITY (PIA) -- Nagbigay ng paalala ang Commission on Elections (COMELEC) Baguio sa mga kakandidato sa nalalapit na 2023 Synchronized Barangay and Sangguniang Kabataan Elections (BSKE).
 
Ayon kay COMELEC-Baguio Election Officer Atty. John Paul Martin, ang mga makapaghahain ng kanilang Certificate of Candidacy sa Agosto 28 hanggang Setyembre 2 ay ituturing ng kandidato.
 
"In previous elections kasi, you will only be considered as a candidate at the start of the campaign period. But now, since this is a manual Barangay and SK Elections, the rule on automated election is not applicable. That's why kapag nag-file ka ng COC, kandidato ka na agad," paliwanag ni Martin.
 
Naglatag na ang Komisyon ng scheduling para sa paghahain ng COC ng mga tatakbo sa lungsod para sa 2023 BSKE.
 
Ipinaalala ni Martin na pagkatapos ng paghahaing ng COC, bawal mangampanya ang mga kandidato mula Setyembre 3 hanggang Oktubre 18. Aniya, mahigpit na ipinagbabawal ang premature campaigning o pangangampanya nang maaga bago ang itinakdang campaign period sa Oktubre 19-28.

"The COMELEC is really serious on filing cases on premature campaigning," giit ng opisyal.
 
Sa ngayon ay hinihintay naman ng kanilang tanggapan ang guidance kaugnay sa paggamit ng social media sa pangangampanya.
 
Inihayag ni Martin na magandang alternatibo ang paggamit ng social media sa pangangampanya pero hihintayin pa nila ang direkta mula sa kanilang central office ukol sa patas na paggamit ng social media.
 
Sa panahon ng kampanya ay bubuhayin din ng komisyon ang Baklas Team katuwang ang Department of Environment and Natural Resources, Department of the Interior and Local Government, Department of Public Works and Highways, Philippine National Police, at iba pang ahensiya upang masiguro na sa tamang lugar nakalagay ang campaign posters ng mga kandidato.

Ipinaalala pa ni Martin na ipatutupad ang disbursement ban sa Oktubre 19-28, public works ban partikular na ang mga barangay-funded projects sa Oktubre 20-29, at liquor ban sa Oktubre 29-30.
 
Aniya, sa Nobyembre 29 ang huling araw ng paghahain ng Statement of Contributions and Expenditures kung saan, ang mga nanalong kandidato na mabibigong maghain ng kanyang SOCE ay hindi makakaupo sa kanyang puwesto.
 
Una nang nagpulong nitong Miyerkules ang City Joint Security Coordinating Center upang masiguro ang ligtas, tama, at patas na eleksyon.
 
Bagama't isa ang Baguio City sa mga may pinakamapayapa at pinakamaayos na halalan, sinabi ni Martin na kailangan pa ring mapaghandaan ang mga posibleng banta sa seguridad lalo na ang inaasahang mahigpit na tunggalian sa pulitika.
 
"We are still anticipating possible political rivalries sa mga malalaking barangay pagkatapos ng August 28 to September 3 filing ng COC, at least may maliwanag na picture tayo kung sa tingin ba natin, manageable pa or sa tingin natin, mag-augment tayo ng mga pwersa to manage 'yung peace and order sa mga barangays natin," ani Martin.
 
Nananatili sa green category ang Baguio City o ibig sabihin, walang naitalang security concerns at mapayapa ang isinagawang mga eleksyon sa nakaraan. (DEG-PIA CAR)