TAGBILARAN CITY, Bohol, Aug. 10 (PIA) -- Kompirmado na sa Department of Agriculture Bureau of Animal Industry (DA-BAI) nga positibo sa African Swine Fever (ASF) virus ang nakuha nga dugo sa mga blood samples gikan sa mga baboy nga nasakit sa 9 ka mga balay nga may mga ginagmay nga baboyan didto sa San Vicente Pilar.

Kini maoy gitaho ni Provincial Veterinarian Dr. Stella Marie Lapiz didto sa espesyal nga edisyon sa Capitol Reports Martes sa hapon didto sa Capitolyo.

Matud ni Lapiz, kinsa kauban ni Provincial Administrator Asteria Caberte sa Capitol Reports, ang kompirmasyon nagasukad sa DA Regional Laboratory Research and Development facility niini sa Central Visayas

Apan, gipasabut sa hepe sa buhatan sa mga beterinaryo nga hangtud makuha ang laing resulta sa labing bag-o nga blood tests gikan sa 100 ka metros ug 500 ka metros palibot sa lugar diin natumbok ang sakit, ug hangtud magnegatibo pa gihapon kini, mahimong dili na ideklara ang entiro lalawigan nga may suliran sa ASF, segun pa ni Dr Lapiz.

Ang dali nga depensa ug pagpahimutang sa mga sistema aron dili makagawas ang kagaw didto sa lugar nga apektado na sa nahisgutang sakit sa baboy nga hilabihan ka mananakod, naka-ingon nga nababoy ang kagaw ug wala na kagawas pa sa lugar aron makapanakod sa mga silingan nga babuyan.

Dihang nakuha sa Office of the Provincial Veterinarian ang taho sa nangamatay nga baboy sa Pilar, dali kini nga gipahimutangan og cordon ang mga kabalayan nga natumbok ang mga apektado nga baboy, aron dili na kini mapasudlan pa og mga tawo nga mahimong maoy makadala sa sakit nagdto sa gawas.

Gipagawas usab dayon ni Gob Erico Aristotle Aumentado ang Executive Order No 37, nga nagpalihok sa Bohol ASF Task Force aron ilatag ang protocols sa pagpugong sa ASF, bisan pa nga wala pa makompirma ang presensya sa viral infection.

Matud pas Task Force, gipahimutangan na usab og mga footmats nga may mga disinfectants ang mga pultahan sa mga balay samtang mohatag ang Kapitolyo og relief nga mga pagkaon alang sa 9 ka mga banay nga apektado ug dili una makagawas, dayag ni Provincial Administrator Aster Caberte.

Gawas sa upat ka baboy nga nagnegatibo pa sa viral infection nga wala pa mahipos, kini nga mga baboy patyon aron dili na makapakatag sa sakit samtang andam na usab ang indemnification fund agi og pahinungod sa nagbuhi sa baboy nga mawad-an na niini.

Apektado man ang mga baboy sa 9 ka mga banay, nagnegatibo pa sa timailhan sa viral infection ang mga baboy nga anaa na sa gawas sa 100 meters ngadto sa 500 meters nga palibut gikan sa mga nasakit nga baboy, taho ni Dr Lapiz, kinsa usab Executive Officer sa Bohol ASF Task Force.

Segun sa nasudnong balaod sa ASF, kon sulod sa 15 ka adlaw sukad mamatikdan ang sakit, pabilin nga negatibo pa gihapon ang mga silinganan niini, nagpasabut lamang kana nga kontrolado na ang sakit, ug dili na kinahanglan pang ideklara ang tibuok lugar nga may ASF.

Subay sa babayeng beterinaryo, tulo ka sitwasyon ang gikinahanglan aron ikadeklara ang usa ka lugar nga may delikado nga ASF:  may positibo nga kagaw nga nakasulod, may lain pa nga kaso sulod sa lalawigan ang mobuto, ug nagpadayon nga pagkatag sa kaso sa unang dapit nga natumbok sa sakit.

Sa kaso sa Bohol, namatikdan man ang tinubdan sa kaso, gilauman sa mga tinugyanan nga tungod sa aktibong pagbantay sa katawhan, wala nay lain pang kaso nga mobutho, ug nga mohunong na ang sakit didto sa Purok 6 sa San Vicente Pilar.

Tungod niini, dili pa ikadeklarar ang tibuok lalawigan nga apektado na sa ASF, matud ni Lapiz. (RAHC/PIA-7/Bohol)