SYUDAD SANG ILOILO (PIA) -- Bilang pagkilala sa importante nga bahin nga ginadala sang komunikasyon kag impormasyon sa pagtukod sang nasyon, nagpaguwa si Presidente Ferdinand Marcos Jr. sang proklamasyon nga nagadeklarar sa bulan sang Oktubre sang tagsa ka tuig bilang “Communications Month” kag tagsa ika-onse sang bulan bilang anibersaryo sang Presidential Communications Office (PCO).

Sa duha ka pahina nga Proklamasyon Numero 308 nga ginlagdaan ni Executive Secretary Lucas Bersamin sang Agosto 2, ginhatagan pagtamod ni Presidente Marcos ang importante nga bahin sang komunikasyon sa pagbuyok kag paglakip sa mga pumuluyo kag industriya sang media sa pagpasanyog sang kalidad sang publiko nga diskurso sa tanan nga butang sa pagdumala.

gintugyanan ang ahensya nga magkilala sang programa, proyekto kag aktibidad para sa tuigan nga selebrasyon.

Ginaduso man ni Presidente Marcos ang tanan nga ahensiya; government-owned or-controlled corporations; state universities and colleges; tanan nga lokal nga panguluhan; non-government organizations; kag pribado nga sektor sa pagpasakop kag suportahan ang PCO sa pag-obserbar sang Communications Month kag ang anibersaryo sini.

Sa idalum sang Executive Order No. 11 kag Executive Order No. 16 (s. 2023), ang PCO ang responsible sa paghimo, pagbalay, pagpasanyog, pagpa-uswag, pagpatahum kag koordinasyon sang messaging system sang sanga ehekutibo kag talatapan sang Presidente. (AAL/LAF/PIA6-Iloilo/PND)