Sa bilog nga pungsod, kapin 99.6 porsyento kang mga negosyo ang ginakabig nga MSMEs, gani, gintugruan importansya ni Eusores ang andang bulig sa pangnasyonal nga ekonomiya kag ang anda mas bahol nga kontribusyon kung mangin daragkol ron nga negosyo sa urihi.

Para man sa nagakaangay kag dugang nga suporta sa mga MSME, ginhambal kang opisyal nga tuyo kang andang ahensya nga mas pasangkaron ang “network” sa merkado paagi sa pagtukib kang iban pa nga oportunidad, pagsiguro nga may target nga kliyente ang mga produkto kag serbisyo, kag pagpartisipar sa mga “trade fair.”

Sa pagkilala sa potensyal kang digitalization, tuyo man kang DTI Antique nga pasanyugon ang kinaaram kang MSMEs sa “digital marketing” kag “e-commerce” gamit ang internet kag iban pa nga inobasyon sa teknolohiya.

Kadyang tuig 2023, sa pagselebrar kang National MSME Week kada ikadarwa nga semana kang Hulyo, ginatinguhaan kang DTI nga magbuhat kang mga oportunidad para sa mga MSME nga makadayalogo sa gobyerno kag pribado nga sektor sa pagbuhat kang mga estratehiya sa pagpa-ugwad kang mga negosyo kag pagsolbar kang nagkalain-lain nga isyu sa merkado.