TAGBILARAN CITY, Bohol, Aug. 8 (PIA) -- Samtang nagpaabut sa ikaduhang kompirmasyon sa pagsulod sa African Swine Fever(ASF)  sa Bohol didto sa San Vicente Pilar, sa mandu ni Gobernador Erico Aristotle Aumentado, ipakatag pa sa mga teams sa Bohol aron isabwag ang kasayuran sa paglikay sa pagtakod sa ASF.

Kini maoy usa sa mga lakang nga tutokan sa Office of the Provincial Veterinarian (OPV) ang pagpakatag pa sa kasayuran kabahin sa ASF, matang sa pagtakod ug sa pagpugong niini, ngadto sa sunod nga 17 ka mga barangay nga nagpalibut sa lugar diin natumbok ang sakit sa baboy.

Ang 17 ka barangay, nasulod sa 7 ka kilometros nga palibot sa San Vicente Pilar, diin namatikdan ang pagbutho sa ASF virus sa mga baboy nga namatay.

Natumbok nga disease surveillance area, ang mga nahisgutan nga barangay pwede pa nga magpagawas sa ilang mga baboy sa ilang mga barangay, apan dili na pwede ipagawas sa Bohol kon wala silay makuha nga Recognition of ASF Free Status ang hayop.

Tutokan sa ASF Task Force ug guyoran ngadto sa mga Barangays ang Information Education Communication (IEC) activities sa kampanya ilabi na sa Bagumbayan, Pamacsalan, Ilaud, Bagacay, Poblacion, Sr. Sto Nino, Lumbay, Bayong, Catagdaan, Cagawasan, Cansungay, Rizal, Estaca, Buenasuerte, San Isidro, Del Carmen, Aurora, ug uban nga mga barangay sa Sierra Bullones, Duero, Candijay, Guindulman ug Alicia.

Kini, matud pa ni Dr. Lapiz, aron makapangandam na usab sila kon ugaling may makagawas nga mga sakit gikan sa Purok 6 sa San Vicente, Pilar. 

Kahinumduman nga gihimo na usab ang una nga IEC ngadto sa Barangay sa Inaghuban, San Carlos ug Catagdaan, taho ni Dr. Lapiz. Kini nga mga barangay, nasulod sa us aka kilometro gikan sa Purok 6 diin namatikdana ng sakit.

Kini human namatikdan ang presensya sa viral infection, ug gipugngan na dayon ang pagpatabok sa mga baboy ug karne gawas sa mga lugar nga natumbok nga naa sa infected area, sulod sa 100 metros ug sulod sa 500 metros nga palibot niini.

Gipasabut usab sa mga tinugyanan nga kon human sa 30 ka adlaw ug wala nay namatikdan nga pagdaghan sa sakit, pwede na nga maihaw ang mga baboy ug itabok sa laing barangay basta lamang makakuha og veterinary health certificate ang nagpatabok niini.

Sa pagka karon, nagpaabut na usab ang Bohol sa ikaduha nga kompirmasyon sa resulta sa mga blood samples nga nakuha sulod sa 100 ka metros ug 500 ka metros palibut sa lugar nga may mga  baboy nga namatay.

Kon magnegatibo kini, may daku na nga posibilidad nga dili na ideklara ang kinatibuk-ang Bohol nga apektado sa ASF, matud ni Dr. Lapiz. (RAHC/PIA-7/Bohol)