PUERTO PRINCESA CITY, Palawan (PIA) -- Tiniyak ni Armed Forces of the Philippines Chief of Staff Gen. Romeo S. Brawner, Jr. na ipagpapatuloy ang re-supply missions sa West Philippine Sea (WPS) sa kabila ng nangyaring insidente ng pambobomba ng tubig ng Chinese Coast Guard sa mga barko ng Pilipinas na naghatid ng mga supply sa West Philippine Sea noong Agosto 5.

“Definitely we are going to pursue our operation and re-supply operations. Itutuloy po natin itong mga re-supply operation natin. As to the schedule, we are leaving that to the Commander of the Western Command. As to the specific actions, and tactics, we are also leaving that to the Commander of Western Command. The important thing that we have to remember here, is that we are supplying, re-supplying our troops who are on board a commissioned ship of the Philippine Navy, ito pong barkong ito ay commissioned pa rin hanggang ngayon and is still flying our Philippine Flag and it is our duty and it is our obligation to bring supplies to our troops who are on board, so hindi po tayo pwedeng pigilin or sabihan kung anong dapat gawin doon, we are operating in fact within our Exclusive Economic Zone, so we will continue our re-supply missions,” ang pagtiyak ni Heneral Brawner.

Ang tinutukoy dito ni Gen. Brawner na barkong commissioned pa rin ay ang BRP Sierra Madre (LS57) na nakasadsad sa Ayungin Shoal at naging tirahan ng mga sundalo na nagbabantay sa nasabing isla at hinahatiran ng mga suplay tulad ng pagkain at tubig.

Bumisita sa Western Command (WESCOM) Headquarters noong Agosto 10, 2023 si Gen. Brawner, bilang bahagi ng regular na pagdalaw ng bagong AFP Chief of Staff sa mga kampo ng militar upang alamin ang kalagayan ng mga sundalo ng bansa.

Sa kanyang pagdating ay binigyan ito ng arrival honor, sinundan ito ng kanyang pakikipag-pulong sa mga opisyal ng iba’t-ibang unit ng military sa ilalim ng WESCOM kung saan nagbigay dito ng briefing si WESCOM Commander Vice Admiral Alberto B. Carlos patungkol sa operasyon ng WESCOM sa Palawan at humarap din ito sa media sa isang press conference.

Sa press conference sinabi nito na maliban sa regular na pagbisita sa mga kampo ng militar ay pumunta rin siya sa Palawan upang alamin ang totoong nangyari sa West Philippine Sea kaugnay ng water cannon incident kamakailan.

“Im here, especially because of what happened last Saturday, para mapag-aralan ko kung ano ‘yong totoong nangyari and we will see how we can probably change some of our policies or maybe increase more resources into WESCOM,” pahayag ng heneral.

Sinabi din nito na mariing kinokondena ng AFP ang aksiyong ginawa ng Chinese Coast Guard na pambobomba ng tubig sa mga barko ng Pilipinas sa WPS pero hindi nito kinokondena ang relasyon ng China sa Pilipinas dahil mayroong diplomatic relation ang dalawang bansa.

"Sa atin naman, ‘nong mangyari ‘yong insidente na ‘yon ay kaagad-agad tayong nagbigay ng statement, hindi lamang ang AFP and even the Philippine Coast Guard at ang sinabi natin , that we are strongly condemning the actions done by the Chinese Coast Guard and the Chinese Militia. ‘Yong actions kino-condemn natin, but not the relations, kasi meron tayong diplomatic relations with the China. In fact, ‘yong economic side natin eh talagang, we defend heavily on China, but when it comes to the military side, meron tayong tinatawag na military diplomacy, so sinusunod natin yon, kaya nga nagpapadala tayo ng mga estudyante abroad sa China para mag-aral doon, that is part of the military diplomacy. Kasi kahit saan ka pumunta sa buong mundo, ang mantra ng mga armed forces is to prevent war, not to encourage war.” Dagdag na pahayag ng heneral.

Ayon pa sa Heneral, mayroon ding water cannon ang mga barko ng Pilipinas ngunit ito ay ginagamit sa pagligtas ng buhay at hindi sa coercive manner.

“Meron din naman tayong water cannon, doon sa ating mga coast guard ships, even the navy ships pero hindi natin ginamit, kasi we follow the rules, yong water cannon na ‘yan ay ginagamit natin to save lives, kung may sunog ang isang barko ‘yon ang ginagamit natin na pangpatay ng sunog. We don’t used it in a coercive manner, so tayo, sumusunod tayo sa mga batas kaya nga sinusulong natin yong rule base order.” Ang huling pahayag ng heneral. (OCJ/PIA-Palawan)