SAN JOSE, Antique (PIA) -- Ang pungsod kang Pilipinas nagahiwat run ka ika-14 nga tuig ka anibersaryo ka implementasyon kang Magna Carta of Women ukon Republic Act 9710 umpisa nga ginpasar ang dyang layi kang Agosto 14, 2009.
Si Senador Loren Legarda sa sangka pahayag naghambal nga ang Magna Carta of Women sangka importante nga binuhatan kang Kongreso kag kadarag-an kang pungsod.
Dugang hambal ni Legarda nga ang dya nga layi padayon nga ginasuportahan kang Kongreso para protektahan ang kinamatarong kag kaaraydan kang mga kababaihan.
Sa pagpanguna ni Senador Pia Cayetano bilang principal sponsor kang dya nga layi, kaimaw ang mga co-sponsors kang Senate Bill 2396 kag House Bill No. 4273, ginpirmahan ni Presidente Gloria Macapagal Arroyo ang dyang dokyumento bilang kasugu-an matapos dya nga naaprubahan kang ika-14 nga Kongreso.
Ang dya nga kasuguan nagatao kang husto nga mekanismo para ipatuman ang mga kinamatarong kang kababaihan kag sundon ang mga legal nga pamaagi para mapauswag kag mapasanyog ang patas nga oportunidad sa kababaihan nga maka-partisipar kag makabulig sa kauswagan sa bahin kang politika, ekonomiya, sosyal kag kultura nga aspeto.
Ang Magna Carta of Women nagasanto man sa implementasyon kang Convention on the Elimination of All Forms of Discrimination Against Women (CEDAW), sangka Internasyonal nga kasugtanan nga ginpirmahan kang Pilipinas katong Hulyo 15, 1980.
Si Legarda nagpadumdom man sa tanan nga magbuligay para ipatuman ang dya nga layi agud pamatukan ang tanan nga sahi kang pagpang-abuso sa kababaihan. (AGP/PSM/PIA Antique with reports from Cherry Ann Santosildes/GIP)
