ILIGAN CITY (PIA)--Sa pagpasiugda sa community engagement ug corporate social responsibility (CSR), ang Iligan Light and Power, Inc. mipadangat sa ilang makanunayon nga suporta ngadto sa unom ka publikong eskwelahan dinhi pinaagi sa Brigada Eskwela nga inisyatiba.

Kini nga mga tunghaan mao ang Ditucalan Elementary School, Tomas Cabili National High School, Tubaran Central School, Tubaran National High School, Sgt. Miguel Canoy Elementary School, Suarez Central School, and Sultan Maminta Panandigan Integrated School, nga gipili sa Department of Education (DepEd) Division sa Iligan.

Tumong sa ILPI nga mapahingusgan ang pagboluntaryo sa mga empleyado ug pagtabang sa mga eskwelahan sa umaabot nga pag-abli sa kalse. Karong tuiga, adunay 77 ka empleyado ang niboluntaryo sa pagsuporta sa mga eskwelahan sama sa pagpintal sa mga lingkuranan sa classroom, pagpanindot sa eskwelahan, paglimpyo sa mga tanom ug pagsulbad sa mga isyu sa kuryente.

"Kining Brigada Eskwela, in line ni sya sa activity or endeavors sa CSR na team wherein ma-enhance pod ang volunteerism sa mga empleyado sa ILPI," matod ni Jeffre Opema, spokesperson sa ILPI.

Samtang, sumala Casa Belandres, Human Resource Administration Group manager sa ILPI, wala sila naglisod sa pagenganyo sa ilang mga empleyado nga magboluntaryo.

"Pirme na namo ni ginabuhat. In fact, ang among employees, they look forward na maghold napod mi ug mga Brigada Eskwela activities, and we did not have any problem at all sa pag-enganyo sa mga employees to join us in this undertaking," sumala niya.

Mapasalamaton ang mga school head ug magtutudlo sa suporta nga gihatag sa ilang mga eskwelahan.

"We are so happy. Thank you so much for your support. Bisan naa mi sa bukid. Ang among school japon ang isa sa inyng napilian para tagaan ug support," matod ni Elsa Gabisay Abdul, Brigada Eskwela Coordinator sa  elementary level sa Sultan Maminta Panandigan Integrated School sa Barangay Bonbonon.

Samtang, si Tubaran National High School Assistant School Principal Lilibeth Borongan, nipadayag sa kamahinungdanon sa kontribusyon sa ILPI sa paghatag og mga poste sa kuryente ug pagpanindot sa ilang eskwelahan.

Mapasalamaton sab si Bernie Lubguban, school head sa Tomas Cabili National High School, sa dakong tabang sa ILPI sa pagsiguro sa kaayohan sa mga estudyante ug magtutudlo sama sa paghatag ug mga poste sa kuryente ug sa makuti nga pag-ayo sa mga isyu sa kuryente. (LELA/PIA-10/Lanao del Norte)